На повидок нов дипломатски фронт со Бугарија

Јонко Грозев, адвокат на бугарскиот Хелсиншки комитет за човекови права

Бугарија уште живее во санстефанскиот сон

Можно е во иднина Софија да ги прогласи сите Македонци со бугарски пасоши за Бугари и да бара посебни права за нив во Македонија, вели Грозев

Проблемот на Бугарија со Македонците е идеолошки, смета Јонко Грозев, адвокат на бугарскиот Хелсиншки комитет за човекови права. Во интервју за Дојче Веле, тој образложува дека идентитетот кој во Бугарија се гради од втората половина на предминатиот век во целост се заснова на идејата за национална држава. Во праксата, таа идеја минала низ официјалната историографија, образованието и тоа е една политичка пракса од средината на предминатиот век. Од таа гледна точка, сите земји со словенско население во целиот балкански регион се всушност Бугари, а за етнички граници се сметаат границите на Санстефанска Бугарија.
- Повторното постигнување на таквата целовитост на таа бугарска држава е основниот двигател на политичката идеологија околу која е изградена бугарската држава. Поради тоа, прифаќањето на фактот дека во Бугарија има луѓе кои се идентификуваат како етнички Македонци е исклучително тешко за бугарското општество. Тука не е во прашање да се дозволи на едно малцинство да се чувствува како сака. Ние немаме никаков проблем со Турците, со Ромите, со Ерменците, итн. Со нив проблемите се во однос на прагматичната политика. Во однос на Македонците проблемот е во целост на полето на идеологијата. Самото признавање дека во Бугарија има луѓе кои се идентификуваат како Македонци значи дека основниот идеолошки концепт околу кој е изграден бугарскиот идентитет не е точен. Значи, не е можно Бугарија да е разделена на делови, а во неа да има луѓе кои се нарекуваат Македонци, вели Грозев.

Од гледна точка на мнозинството, во Бугарија се прифаќа дека Македонија се изградила како независна држава со јазик, историја итн., но со крцкање на забите, со една болка.
Грозев смета дека Македонците не треба да се чувствуваат загрозени бугарски негации и аспирации како безбедносни проблеми, но може во иднина да се случи, Софија да ги прогласи сите овие граѓани со бугарски пасоши за Бугари и да бара посебни права за нив во Македонија.
- Сепак, иако со делењето на пасоши на Македонците се добива некакво задоволство тука, идејата дека со тоа се турка некаков Тројански коњ во Македонија за мене е неприфатлива. Како што ви реков, основното јавно мислење во Бугарија го прифати фактот дека постои независна Македонија, вели Грозев.

http://www.vecer.com.mk/default.asp?ItemID=84CC151132C9A04E9300D6737FD37233