РАМКОВЕН ДОГОВОР?!

Охридскиот договор се уште е еден од најважните фактори за стабилноста на оваа земја. Тоа е договор кој го даде решението на многу деликатната ситуација во 2001 година.

Рамковниот договор беше и продолжува да биде гарант на мултиетничкиот карактер и на политичкиот систем на ова општество. Направен е огромен прогрес, но има области каде е потребно да се продолжи со напорите за имплементација. Пет области се особено чувствителни.

Ова е одговорот од амбасадорот на ОБСЕ во Република Македонија, Хозе Луис Хереро, на прашањето од интервјуто за МИА, што значи Охридскиот договор, осум години од неговото потпишување и дали го отсликува мултиетничкиот и мултикултурниот карактер на македонското општество.

„Рамковниот договор е потполно валиден денес, но треба да се вложат допoлнителни напори во образованието, еднаквата застапеност, недискриминацијата, децентрализацијата и употребата на јазиците. Сметам дека документот е столб на стабилноста на оваа земја. Најважно, духот на Охридскиот договор треба да биде база за дефинирање на политичките потези“, вели амбасадорот Луис Хереро.

Неговата порака е да се зајакне мултиетничкиот карактер на државата, луѓето да го прифатат, подвлекува, со радост постоењето на повеќе етнички заедници, но не затоа што тоа го промовира Рамковниот договор, туку затоа што тоa е нивна желба.

Во интервјуто за МИА, Луис Хереро оценува дека Македонија е стабилна земја, но, како што вели, некои фактори на ризик се уште се присутни.

Во врска со најавата од страна на ДПА за бојкот на работата на Собранието, амбасадорот на ОБСЕ смета дека бојкотот на институциите не е разумен чекор.

„За да се делува демократски во земјава, треба да се биде присутен во институциите, и без разлика на различните погледи, да се води борба за нив во регуларните демократски институции“, рече тој.

Луис Хереро уште еднаш нагласи дека Рамковниот договор е највалидната формула во овој момент.

Одговарајќи на прашањето дали смета дека Охридскиот договор не треба да биде редефиниран, тој подвлекува дека документот не е перфектен, но се потврди како најкорисен инструмент.

„Во овој момент сметам дека е поризично да се отвори дебата отколку да се продолжи со неговото имплементирање. Како што реков перфектен свет не постои, но најдобро е да се продолжи понатаму со имплементацијата“, оцени амбасадорот на ОБСЕ, Хозе Луис Хереро, во интервју за МИА.