Бранко Црвенковски - пензионер

- Барањето на поранешниот претседател е согласно законот, но се наметнува морална дилема дали е вистинско време да се оствари ова право бидејќи господинот Бранко Црвенковски се определи за понатамошно политичко дејствување како лидер на политичка партија во опозиција. Ние ќе гласаме за него, но се наметнува потреба од натамошно размислување за допрецизирање на одредбите од овој закон заради остварување на ова право во иднина, изјави пратеникот Оливер Дерковски од ВМРО-ДПМНЕ.

Ставањето на оваа точка на дневен ред на Комисијата за Никола Ќуркчиев е преседан и побара за неа да не се расправа.

- Ова требаше да биде завршено без расправа. Оваа Комисија не е место за менување на Уставот ниту на законите. Комисијата треба да работи согласно Деловникот на Собранието. Според тоа за вашите дилеми и размислување овде воопшто не е место да го правите тоа. Тоа можете да го направите на некоја прес-конференција. Работата е сакаме ли ние да донесеме одлука согласно законите и Уставот или не, рече Ќуркчиев.

Претседателот на Комисијата Илија Димовски објасни дека точката ја ставил на дневен ред иако има овластување да го потпише решението и да ги извести пратениците имајќи предвид дека ова собраниско тело првпат е соочено со ваква постапка и затоа сметал дека одлучувањето треба да биде транспаретно.

- Не е преседан. Оценив дека од аспект дека првпат во Република Македонија се соочуваме со вакво барање за остварување на пензија според Законот за поранешен претседател донесен во 2004. Господинот кој го поднел ова барање во истиот момент извршува политичка функција која апсолутно има потреба од целосно работно време - ангажираност во својата матична политичка партија, изјави претседателот на Комисијата Илија Димовски.

Димовски посочи оти јавно кажал дека ќе ја стави точката на дневен ред, но дека ќе ја искористи деловничката можност да не го употреби овластувањето што го има и расправата да ја донесе на Комисијата бидејќи, според него, огромен број новинари и експерти во јавноста ја наметнаа дилемата дали сето ова е во согласнот со некои морални и етички стандарди.

- Ќе гласам „за“ бидејќи законот ме обврзува да гласам така, ако беше дискреционо право на пратениците да одлучат дали е оправдано или не е оправдано тоа барање веројатно ќе гласав сосема поинаку. Македонија 19 години е надвор од поранешниот систем. Не можеме работите да ги решаваме во ходниците и во тесните канцеларии, смета Димовски.

Пратениците исто така ги изгласаа и барањата за остварување право на плата во траење од една година за поранешните министри Перо Стојановски, Аце Спасеновски и Ивица Боцевски, како и на заменик министерот за земјоделство Христијан Делев, како и на поранешниот претседател на Регулаторната комисија за енергетика Славе Ивановски.

На седницата беше утврдена предлог одлуката за претседател на Комисијата за верификација на фактите да биде избран Шпенд Димца и за негов заменик Чедомир Дамјановски.

Џевад Адеми од ДУИ побара и членовите на Комисијата за верификација на фактите да достават изјави дека не соработувале со службите за безбедност и разузнавање.

http://kirilica.com.mk/vest.asp?id=29860