Какви видови гаќи користите

Интимната облека ја претставува внатрешноста на секоја жена, која само малкумина можат да ја видат. Иако невидлива, долната облека отсекогаш претставува еден од најважните делови од женската облека. Кај жените постои тенденцијата да изгледаат атрактивно и секси, а долната облека им го овозможува саканото чувство.
Романтична, вамп, невестинско девствена, спортски, секси, а во поново време високо место заземаат и ретро, фанки, панк. Колку типови на жена има, толку видови и на интимна облека постојат.

Црвена како крвта

Се мисли дека доаѓа од Шпанија од средниот век, кога не било дозволено да се носи црвена облека бидејќи црвената боја се поврзувала со крвта и со ѓаволот. Луѓето ја носеле и покрај се, затоа што ја сметале за симбол на живост во мрачните денови. Затоа што официјално црвената боја била забранета, жените почнале да ја носат под облеката. Тоа е причината за настанувањето на култната црвена интимна облека. Црвената боја ја прави уште пораскошна интимната облека, особено во модерното време надополнета со тантела, слоевити карнери, набори и со тил. Не попусто градникот наречен „ред хот фентази“, кој чини 15 милиони долари, е направен од црвен сатен и од 1.300 парчиња драги камења, кои ги вклучуваат рубините и дијамантите. Ова парче е дело на сензационалната „Викторијас сикрет“.

Повеќе покрива отколку што открива

За оваа сезона интимната женска облека има примеси на изглед винтаж, кој повеќе покрива отколку што открива. Материјалите кои се проѕирни и сатенски се во бојата на кожата, пастелно розовата, бојата на пудрата или белата. Впечатокот кој го остава е старо-нова женственост.
Една од најпопуларните долни облека е бебидолот. Толку слатко и невино име за вакво моќно парче во женската интима. Оваа долна облека претставува интимна вечерна тоалета за жените, наменета само за спалната соба. Горниот дел е со прерамки и ги истакнува градите, а надолу се спушта лелеаво преку колковите и ги истакнува нозете. Мистичноста измешана со невиноста ќе ја доловите ако горниот дел е од непроѕирна ткаенина, а долниот од тантела, која ја открива силуетата на вашето тело. Обично се комбинира со танга гаќи, кои се од истиот материјал и боја. Жените го обожаваат овој детаљ, особено за спиење бидејќи им ја дава слободата на телото.
Најновите ревии за долна женска облека слободно можеме да ги наречеме „од минатото до вечноста“. Тие ви ги враќаат корсетите и градниците на вашите баби. Кратките гаќи (по кои се создадени боксерките) и корсетите се шиени од тенки ткаенини, а се врзуваат со сатенски врвки или се закопчуваат со ситни светликави копчиња. Имаат најразлични везени апликации, од рустикални до современи, надополнети со нежна тантела.
Романтичната интимна облека е исполнета со благо нагласени бои и со нежни детали. Мотивите се различни, цветни примероци, децентна свила, точки, панделки или ситен каро-дезен, со принтови на ѕвездички, а ткаенината е најчесто памучна и лесна.
Романтичарките ја сакаат девствената бела или нежнорозовата тантела, која им дава дополнителна женственост на овие модели. Тоа е доказ дека романтиката никогаш не излегува од мода.

Се гледа и шокира

Фанки-интимната облека повеќе изгледа како маица-градник, која се носи за да се види, а не да се сокрие под облеката. Овој стил е резервиран за помладите девојки, кои се секогаш подготвени за забава. Изработена е од памук во денди и во момчешки стил, лежерен и спортски.
Моќната вамп-долна облека е провокативна и дрска, храбра комбинација на сатен и на тантела, за оние жени кои сакаат да шокираат. Обично оди во комплет со танга-гаќи, со животинска шара (тигреста или леопард), а боите се потемни. Ги вклучува и гламурозните материјали - крзно, свила, кадифе.
Ако сакате под вашиот сериозен моден стил да изгледате палаво, одберете екстравагантната, но децентна интимна облека. Сатенски градник со гаќи во црвено-црна боја со мали карнерчиња. Однадвор ќе изгледате строго, а вашето тело под облеката ќе изгледа секси.
Убавата тантела го има своето враќање на големиот трон. Провокативната тантела низ која се само наѕира нежната кожа на женското тело е доволна да ги поттикне машките фантазии. Кај оваа долна облека преовладува луксузната тантела, свилата и разни додатоци, а ќе ги нахрани сите сетила на вашиот партнер, препорачува модната куќа „Споил“. Новите колекции изобилуваат со бои како што се црната, виолетовата, бојата на шампањот и сребрената.

Со цреша во кревет

За жените Лолити познатата креаторка Стела Маркантни ги осмисли нежно пудрастите гаќи и градници на кои се наоѓаат апликации од сезонско овошје. Оваа колекција ви дава можност за секој ден да одберете по едно овошно парче долна облека - лубеница, праска, цреша, банана или ананас.
Ретро-моделите инспирирани од 40-тите години се исполнети со градници во комбинација со женски боксерки или со танги, од интензивни шарени материјали дополнети со необични везови, и ќе ги воодушеват модните фанови.
Мажите ги обожаваат жените кои носат корсети и чорапи со подвески или самостоечки. Жените кои носат подвески тврдат дека поради тоа се чувствуваат возвишено. Овој раскошен детаљ во 18 век бил изработуван од сребрен и од златен брокат и свила и бил украсен со везови од ситни бисери, кои често биле во облик на монограми, а некои дами во тоа време на подвеските ги носеле минијатурните портрети од нивните мажи. Денешните подвески можат да бидат романтично невестински или мистични како ноќта, но нивната порака е единствена - заводливо и секси. Тантелни, украсени со свилени или со сатенски врвки, со перли или со кристали.