ПРЕГОВОРИ ЗА ИМЕТО - 1

Разговори И за македонскиот идентитет

Прашањето за македонскиот идентитет и како овој термин би се употребувал, исто така, треба да биде во фокусот на преговорите за името порача висок претставник на Стејт департментот.

Помошникот државен секретар на САД за европски и евроазиски прашања, Филип Гордон, кој, покрај за други прашања е надлежен и за американската политика кон Македонија, овој став го изнел пред грчки медиуми.

„Во врска со прашањето за името на Македонија, Гордон сугерираше дека преговорите за договор меѓу Фиром и Грција исто така би требало да се фокусираат на прашањето за ’Македонскиот идентитет’ и како овој термин може да се користи“, пишува денеска конзервативниот „Катимерини“.

Посредникот во македонско-грчките разговори за спорот со името Метју Нимиц на денешните разговори со македонскиот државен врв во Скопје предложил одредени измени на последниот предлог за името даден во октомври минатата година.

- На премиерот му изложив одредени измени на октомврискиот предлог и побарав од Владата да размисли за овој пакет во целост, заедно со измените, изјави Нимиц по средбата со премиерот Никола Груевски, на која присуствуваше и вицепремиерот Абдулаќим Адеми.

Од властите тој рече дека  добил уверување оти измените  детално и сериозно ќе бидат дискутирани и разгледани. За предложените измени, Нимиц најави дека ќе разговара и со грчката министерка за надворешни работи Дора Бакојани и со преговарачот Адемантиос Василакис во Атина, каде заминува попладнево.

Запрашан за какви измени станува збор, тој не изнесе детали, бидејќи, како што рече, во јавноста не е објавен ниту предлогот.

Во однос на самиот процес, медијаторот Нимиц посочи дека станува збор за комплексно прашање и оти целта е достоинствено решение за двете страни кое ќе го заштити идентитетот на земјата и ќе реши тешко прашање во регионот. Коментирајќи го нивото на разговори кое е различно кај двете инволвирани страни, тој рече дека тоа е прашање на секоја од земјата, но оти за него е важно што и кај двете земји има пристап на многу високо ниво.

Запрашан дали постојат какви било шанси грчката страна да прифати постоење македонска нација и јазик, посредникот на ОН го повтори ставот дека разговорите се однесуваат на името, а не на идентитетот, без при тоа ниту еднаш да го употреби уставното име на државата.

- Примарно зборуваме за името на земјата. Никогаш не сум слушнал кој било официјален грчки претставник да негира дека оваа земја и луѓе имаат единствен идентитет и единствен јазик. Доаѓам во оваа земја од 1994 година и преговорите ги водам веќе 15 години. Знам дека оваа земја има идентитет, има јазик и мислам дека никој во светот не го доведува тоа во прашање. Постојат некои прашања во врска со ова, но не и прашањето дека постои јазик или националност. Затоа луѓето треба да се чувствуваат удобно бидејќи зборуваме за референцата за името, а не и за идентитетот, рече Нимиц.
Во однос на можноста од предвремени избори во Грција наесен, медијаторот со став дека тоа не е негов проблем како посредник во разговорите за името, но доколку има можно е извесно пролонгирање на разговорите. Медијаторот Нимиц посочи дека тој не ги поставува роковите, но оти е можно конечно решение во следните месеци.

- Прашањето е можно да се реши, а постои и голем интерес за тоа. Таков впечаток добив денеска од премиерот, претседателот и од министерот за надворешни работи за продолжување на процесот. Сметам дека двете страни се подготвени и решени да го постигнат тоа, посочи посредникот во разговорите за името Метју Нимиц.

Нимиц денеска за процесот околу спорот разговараше и со претседателот Ѓорге Иванов, а вчера со министерот Антонио Милошоски.