Изборно гласање од дијаспората

 

Архитекти, инженери и други стручњаци ќе прават проекти за нови урбанистички решенија и ќе го креираат економски развој на општината

 

Педесетина архитекти и градежни инженери од земјава и од странство, кои потекнуваат од Крива Паланка, ќе прават нова лична карта на градот, како свој придонес во решавањето на урбанистичките проблеми и новиот функционален и модерен изглед на општината. Тие ја прифатија иницијативата „Крива Паланка ве повикува, одбележете го своето постоење во својот роден крај“, на градоначалникот Арсенчо Алексовски, за да придонесат во креирањето на планскиот и урбанистички развој на градот. Секој од својата специјалност и професионално искуство ја понуди својата соработка на неодамнешната средба во манастирот „Свети Јоаким Осоговски“, организирана по покана на градоначалникот. Стручните лица се подготвени да помогнат и со сопствени инвестиции, доброволно учество и лобирање кај надлежните институции.

- Сите професионалци од оваа област се повикани да направат проект или градба со која ќе се креира новата архитектонска слика на градот. Најдобриот проект или објект, кој ќе биде избран од стручњаците, ќе го носи името на проектантот или градителот, со што тој ќе остави траен белег во својот роден крај, а тоа нема цена - истакна градоначалникот Алексовски.За да помогнат во новото урбанистичко-архитектонско креирање на локалната заедница, беше формирано координативно тело и изнесени идеи и насоки за преземање конкретни активности.

- Сега сме во почетокот и треба да тргнеме од мртва точка за да го направиме она што му недостига на градот. Најпрвин треба да се обезбедат неопходните плански документи, а понатаму ќе биде лесно преку сопствениот ангажман, аплицирањето до расположивите фондови и заедничка работа да го создадеме новиот лик, кој му треба на нашиот град - рече Жаклина Величковска-Ангеловска, поранешен директор на Државниот инспекторат за урбанизам и член на Координативното тело.

Стручњаците се едногласни дека најпрвин треба да се решат основните урбанистички проблеми со кои многу години се соочува градот. Според нив, бидејќи Крива Паланка е единствена општина што се' уште нема соодветна планска документација поради досегашниот проблем со железницата од Коридорот 8, основна задача е најпрвин да се обезбедат неопходните урбанистички документи. Потоа ќе се зафатат со проектирање одделни локалитети и утврдување на стратегиските приоритети, според предностите што ги нуди подрачјето, а кои ќе овозможат и економски развој на општината.

- Овде има извонредни услови за развој на селскиот туризам и негово поврзување со повеќе други видови туристички развој, кои може да дадат ефикасна целина. Идеално место за туристичко село е урбанизацијата на село Дурачка Река, изградбата на браната на Станечка Река и нивно поврзување со зимскиот туризам, преку жичница до Царев Врв. Подготвени сме со сопствени инвестиции да партиципираме во ова урбанистичко уредување - рече градежниот инженер Насе Марковски.Координативното тело ќе работи континуирано и ќе бидат формирани работни групи по специјалности за да може секој од својата област да даде придонес за новите урбанистички решенија за градот.

Жаклина Цветковска