Црвенковски старо-нов лидер на СДСМ

Во СДСМ владее атмосфера на општо постројување. Се чекаат длабоките резови на Бранко Црвенковски што ќе се случат по конгресот за два дена.

Партиски извори ја потврдуваат ваквата информација и велат оти е јасно дека староновиот лидер ќе оди јако и со радикални промени. Невообичаено кратката седница на централниот одбор од само 40-тина минути покажува дека и централниот и надзорниот одбор едногласно и без дискусија ја поддржаат одлуката за колективна оставка.

Екс претседателот на СДСМ Бучковски вели дека со ова се отвори простор за свикување на нов конгрес за петнаесет дена на кој ќе бидат избрани новите раководства.

„Големи се очекувањата сите се надеваат и посакуваат дека со враќањето на Бранко Црвенковски конечно ќе започне и консолидацијата на партијата како прв многу битен чекор за пресвртница што очекуваме да се случи набрзо, изјави Владо Бучковски.

Инаку во јавноста веќе почна да се шпекулира со имиња. Според информации на Канал 5 најверојатно новиот лидер во раководствата ќе остави половина од старите, меѓу нив најверојатно ќе биде Миле Зечевиќ, Андреј Петров, но ќе има десеттина нови имиња во централниот одбор.

Се очекува на позиции да се вратат и поранешните истакнати членови, Илинка Митрева, Никола Поповски, Ѓорѓи Спасов. Се бара место и за претседателскиот кандидат Љубомир Фрчковски и шефот на изборниот штаб Ѓунер Исмаил. Во недела на конгресот Црвенковски ќе нема против кандидат. Ќе го бираат 600 делегати.