F1 Вести

Берни: "Формула 1 = Ферари!"

Формула 1 и Ферари се "брак направен во рајот" и една од тие работи кои навистина одат заедно, вели Берни Еклстоун по заканите на претседателот на ФИА, Макс Мозли дека спортот може да преживее и без најстариот и најпопуларниот Ф1 тим.
"Не верувам дека Макс го мислеше тоа што го кажа. Тој само му враќаше на Лука Ди Монтеѕемоло. Формула 1 е Ферари, а Ферари е формула 1. Тоа е брак направен во рајот", вели 78-годишниот Еклстоун.



Изменето од Iron Man - 12.Мај.2009 во 21:13

Донесена ли е конечната одлука?

На ден 30 април, по состанокот на светскиот совет за моторспорт на ФИА во Париз, беа објавени правилата за следната сезона. Во членот 6.1 беше образложено дека титулата ќе се решава според тоа кој има најмногу победи во сезоната, односно поточно, “титулата ќе припадне на оној возач кој завршил прв на најголем број трки”. Со тоа повторно се разбранува Ф1 јавноста, при што интуитивна претпоставка е дека речиси сите кои се на било каков начин инволвирани во спортот, од возачите до телевизиските гледачи се против таква разврска на шампионатот.

Но, бидејќи ни тоа не беше доволно, по официјалниот протест на неколку тимски шефови, ФИА донесе одлука повторно да го врати бодовниот систем за следната сезона, покажувајќи конфузност и неодлучност.

За потсетување, хронолошки, првично ФИА го воведе новото правило за тековната сезона, па откако наиде на неодобрување од ФОТА, правилото беше прекомандувано за да дебитира во 2010 година, но со овој потег на ФИА, повторно неговото можно воведување во иднина се остава во неизвесност.

Можеби предлогот е добар и во некои натпреварувања добро функционира, но покрај се, Формула 1 е спорт во кој традицијата е многу значајна, па според тоа е потребно да се задржи истата и да се остане на бодување на првите најдобри возачи. Бидејќи традицијата ни говори дека секојпат шампион бил оној со најголем број на бодови собран во трките, а не најголемиот број на победи.

Во секој случај, не можеме да бидеме сигурни дека ФИА тука ќе стави крај на ова фијаско. Се покажа дека одлуката која била донесена на состанокот не е исправна, а ФИА требаше да го има тоа на ум, земајќи го в предвид фактот што првичниот предлог помина очајно лошо и веднаш, впрочем како и овој пат, беше повлечен. Конфузноста на ФИА не води никаде, а тоа на духовит начин го кажуваат и натписите на повеќето светски Ф1 сајтови, малку адаптирани на македонски сленг - “Сад га видиш, сад га не видиш!!!”

Браун ГП тимот се договори за промотивен договор со Сони Пикчрс за промоција на новиот Терминатор Салвејшн филм, кој ќе излезе во САД на 21 мај. Болидите на Браун ќе бидат пресликани со мотиви од четвртото продолжение на Терминатор, а ова не е првпат во Ф1 да се промовираат филмови, обично во Монако. Јагуар, а потоа и Ред Бул помогнаа во промоцијата на Оушнс 12 и на Стар Ворс 3, додека Тојота лани го промовираше Црниот Витез на Британското ГП. Се шпекулира дека и новиот Трансформерс ќе биде промовиран во Монако.

Себастијан Фетел и неговиот Ред Бул тим не смеат да си дозволат да “фрлат” нови поени оваа година бидејќи сега се во борба за титулата, вели Германецот. “На секоја трка можеш да освоиш 10 поени и е дел од борбата за титулата. Не смееме да дозволиме да губиме глупави поени”, вели Фетел.

Возачот на Вилијамс, Нико Розберг побара итна ревизија на тежината на болидите откако возачите продолжуваат да слабеат за да имаат поконк*рентен болид. ФИА веќе најави зголемување на минималната тежина на болидите за 15 килограми за следната сезона, но Германецот вели дека е предоцна. “Во Бахреин некои возачи ја губеа свеста поради тоа што имаат помалку килограми. Знаеме дека КЕРС додава 30 килограми, но тоа не значи дека ние треба само да слабееме”, вели Германецот.

Луис Хамилтон доби посебна почест од патеката Каталуња во Барселона, една година откако беше цел на расистички напади од гледачите на патеката. Тој сега како светски шампион ќе добие место во Авенијата на шампионите, приклучувајќи се на имиња како Михаел Шумахер, Аиртон Сена, Најџел Менсел, Фернандо Алонсо и Нелсон Пике. “Навистина е фантастично да се биде тука на една од моите омилени патеки и да се добие ваква награда”, вели Хамилтон.

На Алонсо сега му недостасува Хамилтон?


Фернандо Алонсо зборуваше позитивно за својот поранешен колега и актуелен Ф1 шампион, Луис Хамилтон пред Шпанското ГП, откако и двајцата возачи се мачат да остават впечаток по стартот на сезоната 2009. Добрите зборови за Англичанецот дојдоа кога Алонсо се потсетуваше на дуелот во Мекларен во 2007.

“Имавме добра конк*ренција што на двајцата ни помогна да ги најдеме нашите граници. Можам да кажам дека ми недостасува таа конк*ренција на некој начин бидејќи беше забавно. Секогаш ја кажувам истата работа - имав проблеми со Мекларен и никогаш со Луис”, вели возачот на Рено, Алонсо.

Откако освои две титули во 2005 и 2006 со Рено, Алонсо замина во Мекларен, каде што во контроверзна сезона полна со ривалство со Хамилтон заврши зад него и зад Кими Раиконен во Ферари во борбата за титулата.

“Проблемите кои ги имав во Мекларен со големите шефови и со филозофијата на тимот значеа дека морам да си заминам. Луис секогаш бил голем возач и сега е голем шампион. Се бореше за титулата во првата сезона и ја освои во втората. За да си ја поправи својата оштетена репутација од оваа година треба само да победува. Тоа е најважно”, вели Алонсо.

В НЕДЕЛА (14.00) ПОЧНУВА ЕВРОПСКАТА Ф1 СЕЗОНА СО ШПАНСКОТО ГРАН ПРИ
Во Барселона многу работи ќе станат појасни

Шпанското ГП в недела ќе биде вистински показател колку успеале новите храбри правила на ФИА за подобрување на претекнувањето во формула 1. Мазните гуми, смешните задни крила, преголемите предни крила, сите тие ќе добијат вистински тест на патеката Каталуња овој викенд.

Причина за ова е што Шпанското ГП обично е една од подосадните трки во формула 1. Претходно имаше три вакви досадни патеки: Сан Марино (убава и досадна), Шпанија (ветровита и досадна) и Унгарија (само досадна). Имола си замина, но Барселона и Будимпешта остануваат предизвик за носителите на техничките правила. Ако повторно има трка без многу претекнувања во Шпанија, тогаш целосниот редизајн на болидите под директива на ФИА ќе се смета за неуспех.

Добрите вести се што тимовите не можеа да тестираат пред трката и сè уште има многу работа која треба да се заврши во петокот и во саботата, а сега на неколку болиди ќе има и КЕРС. БМВ засега се откажаа од системот, Мекларен речиси сигурно ќе го носат, додека КЕРС-от на Ферари работи само кога ќе посака, како што дозна Фелипе Маса во Бахреин.

Но, од овие три тима нема да се очекува на првиот ред во Бахреин бидејќи Браун ГП тимот ќе направат ново подобрување на својот најбрз болид, а Ред Бул и Тојота исто така најавија нови делови. Браун исто така откри неколку нови спонзори, откако Берни Еклстоун реши да не им ги даде парите од ТВ правата кои требаа да одат кај Хонда.

Џенсон Батон ќе биде повторно човекот кој ќе мора да се победи откако во Бахреин со сигурно возење стигна до третата победа во четири трки. Рубенс Баричело имаше поинаква стратегија и не успеа да остане на врвот, а ќе биде интересно да се види дали Тојота ќе продолжат со стратегијата на квалификации со малку гориво како во Бахреин со Тимо Глок и Џанкарло Физикела. Во Барселона знае да има доста инциденти на првата кривина, така што ако излезе сигурносното возило, тие со празни болиди нема да бидат во предност. Но, со разлика од 1.5 секунди од најбрзите до најбавните, одлуката за тоа со колку гориво ќе се влезе во последните квалификации е клучна за целиот викенд.

Марк Вебер можеби има најдобра шанса оваа година да стане светски шампион (без Мекларен и Ферари на врвот и со можеби најдобриот болид), но мора да почне да освојува повеќе поени од импресивниот колега во Ред Бул, Себастијан Фетел. Младиот Германец е сè подобар.

На Ферари сè уште им треба добар резултат да се надеваат на нешто оваа сезона и традиционално се брзи во Барселона, а лани Кими Раиконен доминираше во трката. Мекларен повторно влеат дека нема да имаат многу шанси во Шпанија, но барем тие се сигурни во перформансите на својот КЕРС систем.

На Вилијамс им требаат исто така брзи поени за да ја искористат предноста на дифузерите пред сите да имаат солидни верзии, додека БМВ мора да излезе од амбисот во кој падна. Работите немаше да бидат толку проблематични ако останеа во партнерство со Вилијамс како пред пет години. Тимот доби целосно нов болид за Шпанија и тоа навистина им треба.

Членовите на ФОТА побараа итен состанок со ФИА, во кој ќе се решат сите работи по кои двете страни имаат спротивни мислења. Ова е одлуката по средбата во Хитроу, во Лондон, каде биле присутни претставници од сите тимови во Формула 1. И претходно беше навестен револтот кај тимовите, особено изразен кај финансиски посилните производители, како Ферари и БМВ Заубер. Италијаните и Германците не го криеа разочарувањето, јавно апелирајќи дека не само што се противници на идејата на ФИА, туку е можно да го напуштат спортот.

Покрај споменатите проблеми, тема на разговор бил и Конкорд договорот, кој сам за себе е контроверзен. При тоа, тимовите генерално бараат поголеми пари за самото учество во шампионатот. Бидејќи веќе истекува постоечкиот договор, се шепекулира дека некои тимови ја продолжиле верноста со ФИА и со Формула 1 менаџментот и со тоа се обврзале на подолг рок, додека други очекуваат позитивни промени од новопотпишаниот договор. Асоцијацијата ФОТА доцна синоќа објави соопштение, во кое на конкретен и директен начин е искажан ставот.

- Извршниот одбор на ФОТА се состана во Хитроу со цел да се разгледаат новите правила предложени од ФИА за 2010 година и да се оцени напредокот на преговорите со сопствениците на маркетиншките права за обновување на Конкорд договорот. ФОТА имаше позитивен и конструктивен состанок и постигнат е договор да се продолжи со заедничката работа за дефинирање на понатамошните мерки за намалување на трошоците во 2010 и 2011 година, со што ќе се пробива патот започнат во 2008 година.

Имаме грижи поврзани со одлуката која беше донесена на седницата на светскиот совет за моторспорт на ФИА, а се однесува на правилата за 2010 година и оттаму бараме итен состанок со ФИА - се вели во сооопштението.

Реакцијата на ФОТА следи по минатонеделната објава од страна на ФИА дека се расположени да воведат двоен принцип за распределување на буџетите на тимовите, а дополнително се вжешти атмосферата со враќање на првично отфрлениот систем на одлука на шампионатот - “winner takes all“.

Берни Еклстоун ја критикуваше ФОТА, изјавувајќи дека имаат погрешен став кога е во прашање ограничувањето на буџетите.

- Големите тимови не го сакаат предлогот бидејќи не им е во гените да добиваат пари од Формула 1. Сè што сакаат да прават е да трошат - ироничен е Британецот.

Тој се надоврза и на предлогот на ФИА, со кој од 10 тимови се проширува квотата на 13, но тој смета дека новите натпреварувачи треба да се изберат внимателно.

- Нема да одиме според принципот “прв дошол-прв услужен”. Не треба да се враќаме на времето кога било кој можеше да дојде, да извози неколку трки и да исчезне кога ќе снема пари. Потребни ни се само три тима. Некои од големите играчи не се среќни, но никој не изјавил дека се повлекува - додава Еклстоун.

Во целата бркотница која ја створија и ФОТА и ФИА и Берни Еклстоун, директорот на Мерцедес, Норберт Хауг ја смири ситуацијата со изјавата дека големите производители не размислуваат за излез од Формула 1.
- И Ферари сака да заштеди пари. Можеби се загрижени за условите на ограничување на буџетите и пристапите на ФИА во минатото. Но во моментов, повлекување не е тема на разговор - изјави Германецот за сајтот spox.com

Во секој случај, не се очекува брза реакција од главниот човек на ФИА, Макс Мозли, кој доживеа семејна трагедија, при што го загуби постариот син.

Интересно е што нема официјален коментар за тоа дали Рос Браун ќе продолжи како технички директор на ФОТА, по несогласувањата кои ги имаше со неколку тимски шефови, а претходно беше најавено дека неговата позиција ќе биде разгледана на седницата.

Кими подготвен за победа по една година пауза

Иако е можеби тешко да се поверува, помина цела година откако Кими Раиконен последен пат победи во формула 1 шампионатот. Сите очекуваа Финецот да доминира во сезоната 2008 откако како актуелен шампион победи на Шпанското ГП на 27 април за втора победа во новиот шампионат, но за несреќа на неговите фанови и на Ферари од таму се тргна надолу. Тој на крајот ја заврши сезоната на третото место, далеку зад шампионот Луис Хамилтон во Мекларен и неговиот клупски колега од Ферари, Фелипе Маса.

По ова следуваа критиките дека "Ајсмен" едноставно ја загубил жедта за победа, а дури и од Ферари велеа дека "не го познаваат човекот во болидот на Кими". Лошата среќа продолжи и оваа сезона и тој моментално се наоѓа на 12. место во генерален пласман со само 3 поени од првите четири трки од сезоната. Но, по се ова Раиконен инсистира дека не ја загубил "страста за победи".

"Помина повеќе од една година од мојата последна формула 1 победа. Во Барселона во 2008 го имав најдобриот викенд со Ферари - пол-позиција, победа и најбрз круг. Од тогаш неколку пати бев блиску, мислам во Мањи-к*р, Монтреал и Спа, но поради различни причини не успеав. Но, и покрај тоа возачот никогаш не ја губи страста за победа и сакам да го добијам тоа чувство што е можно побргу", вели Раиконен за официјалниот сајт на Ферари.

Ферари ќе воведат неколку клучни подобрувања на својот болид за трката овој викенд откако го имаа најлошиот старт на една сезона по повеќе од 20 години, и Раиконен верува дека со тоа ќе може да добие нов старт.

"Навистина ми се допадна кога слушнав каков нов аеродинамички пакет имаме за Шпанија и првите знаци се позитивни. Ќе биде интересно да се излезе со болидот на петочните први тренинзи. Возевме на патеката во март оваа година, но секогаш е тешко да се сфати кој е навистина силен на тие тренинзи. Од тогаш многу болиди целосно се променија. Ќе имаме далеку поголема надолна сила со новиот пакет во споредба со првите четири трки, но скоро сите ќе се појават со некои подобрување. Сега ќе видиме кој завршил подобра работа", вели Раиконен.