Психолози во училиштата

Јавноста секојдневно останува вчудовидена од честите и грозоморни случаи на родосквернавење и на педофилија, чијшто број се зголемува од ден на ден. Никој не остана рамнодушен по откривањето и обелоденувањето на речиси идентичната трагичната судбина на двете малолетни девојчиња, кои по неколкумесечните сексуални злоупотребувања од сопствените татковци, сега се бремени и чекаат дете, кое е плод на инцест.
Психолозите објаснуваат дека и родосквернавењето и педофилијата постојат одамна, но овие потресни приказни останувале затворени во кругот на семејството. Денес се поотворено и полесно се обелоденува овој проблем, од што во јавноста се добива впечаток дека ситуацијата е веќе загрижувачка. - Состојбата одамна е алармантна, но сега сме посвесни за овој феномен бидејќи и децата што се жртви, но и нивните најблиски, се почесто се охрабруваат да зборуваат за проблемот, кој веќе не е табу-тема. Тоа е сигнал дека се прави чекор напред кон решавањето на овој проблем - сметаат психолози.
И невладините организации реагираат на секој нов случај на сексуална злоупотреба на најмладите, кои, според нив, се почесто се жртви на најблиските, кои место да им обезбедат сигурност и љубов, им го уништуваат најубавиот дел од животот и им оставаат трауми за цел живот.Психолозите предупредуваат дека најважно е на жртвите најитно да им се укаже психијатриска помош. Тие се согласуваат дека траумите кај децата што се силувани и кои се сексуално малтретирани се огромни. Според нив, лошото искуство негативно влијае врз нивниот психички живот, поради што овие деца треба задолжително да разговараат со психолог и со психијатар.
- Сексуалната атака на личноста, без разлика дали е во форма на предигра или е целосно сексуално задоволување, кај детето остава силен печат и траума, што го спречува натамошниот психосексуален живот. Во ваков случај, неопходна е терапија кај психолог или психијатар, со чијашто помош траумата на детето нема да остане длабоко закопана во него. Ако, пак, сепак, остане длабоко во личноста, тогаш детето нема да созрева нормално, секогаш ќе има пречки во сексуалниот, професионалниот и во социолошкиот развој “ истакна невропсихијатарот, професор д-р Витомир Мицев.
Со неодамнешните измени во Кривичниот закон, за извршено кривично дело обљуба врз немоќно лице или за полов напад над малолетник помлад од 14 години, се пропишува казна од најмалку 10 години затвор и можност за доживотен затвор. За обљуба со злоупотреба на службена положба, особено за тие што се наставници, воспитувачи, старатели или имаат слична улога во воспитувањето на детето, е предвидена казна од 10 до 15 години затвор, но и забрана за натамошно вршење на должноста.

Нај психолошки спремното училиште во државата