За градинките

Низ инка во градинка во Аеродром

Општината со над 80.000 жители, во која за само 16 месеци се родиле повеќе од 800 бебиња, има две градинки

Во Аеродром се чека ред за упис во детска градинка. Се фаќаат врски, се прават листи на чекање, а градинките се пребукирани. Општината со над 80.000 жители и со претежно млади брачни двојки има само две градинки - „Бубамара“, со клоновите „Пчелка 1“ и „Пчелка 2“ и „Срничка со клоновите „Калинка“, „Црвенкапа“, „Изворче“, „Бамби“, „Чекорче“.

- Не знам како е можно во државните градинки да нема место за децата. Порано тоа се правеше плански. Се знаеше точно на колку жители колку градинки и колку училишта треба да има. Ова е хаос, се трошат пари за споменици, а за децата нема градинки, срамота - вели Панче Деспотовски, кој живее во најмладата општина.

Според податоците од пописот во 2002 година, на територијата на Аеродром има 72.009 жители. Од општината сметаат оти на нивната територија живеат и над 80.000 жители. Од 1 јануари 2008 до денеска во Аеродром се родиле повеќе од 800 бебиња.

- Имам пријатели со две деца, кои нема кој да им ги чува, а за нив нема место во најблиската градинка. Се мачат како црни ѓаволи, молат баби, дедовци да им се најдат, зашто немаат пари да платат дадилка. Често одат и на боледување за да останат со дечињата, може да ги избркаат од работа - вели Деспотовски.

Во Министерството за труд и социјална работа потврдуваат дека имаат сериозен проблем со недостиг од места за децата по градинките. Спиро Ристовски, заменик-министер за труд и социјална политика, вели дека наскоро ќе почне изградбата на две нови градинки во Аеродром.

- Постојните градинки се преполни. Проблем е тоа што од 1991 година тука не е изградена ниту една нова градинка, а прирастот на населението е голем. Градинките во Аеродром прават листи на чекање, што е недозволиво. Во една група треба да има најмногу 20 деца, но практиката покажува дека има групи и со двојно повеќе дечиња. Изградбата на две-три градинки би ги задоволило потребите. Едната поголема градинка треба да биде во Реонскиот центар, а втората во Мичурин, но прво треба да се донесат урбанистичките планови - вели Ристовски. Градоначалникот Ивица Коневски вели дека најдоцна за три месеци очекува да се донесат детаљните планови и оти веднаш потоа ќе почнат подготовките за изградба на градинките. По барање на родителите, градинките може да бидат и билингвални, односно децата да учат и на друг јазик освен македонскиот - вели Коневски.

Цената останува 1.500 денари

Директорките во двете детски градинки „Бубамара“ и „Срничка“ потврдуваат дека чуваат повеќе деца од стандардите, имајќи го предвид капацитетот на објектите. Убавка Шивачева, директорка во градинката „Бубамара“, вели дека се преплавени.Во градинката „Срничка“ во моментов се запишани 1.240 деца, од кои 342 се бебиња.

- Има и такви што се на листа на чекање. На општината реално и' се потребни повеќе градинки - вели директорката на „Срничка“, Тодорка Грпчевска. Директорките на градинките сметаат дека и цената од 1.500 денари не е доволна за потребите на градинката и бараат да се зголеми сумата. Но, од Министерството за труд и социјала велат дека нема да ја покачат цената. Ние ја гледаме реалната слика за стандардот на граѓаните во Македонија. Не тврдам дека тоа е најдобрата цена, но моментов не е погоден за каква било корекција - вели заменик-министерот.

Децата на листи на Чекање

При уписите на децата во градинка надлежното министерство е должно да одговори на секое барање, без разлика дали родителите на деца се вработени или не и колкави се нивните примања.

- Немаме посебни правилници за тоа кои деца и од кави социјални средини имаат или немаат предност. Сите деца при упис во градинка се рамноправни. Токму од овие причини ние мора да се ангажираме и да изградиме уште градинки.Имаме реален проблем - недостиг од простор. Правиме и нов правилник на стандарди за градинките. Даваме можност да се отвораат вакви установи по принципот на јавно приватно партнерство. Правилникот е готов, треба уште да биде одобрен од Владата - објаснува Ристовски.

Директорката на градинката „Срничка“ потврдува дека уште сега прават листи на чекање за деца што треба наесен да тргнат во градинка. Грпчевска вели дека листите ги прават оти имаат неверојатна побарувачка за место во градинките и оти на овој начин родителите што се пријавуваат порано, имаат поголеми шанси да си го запишат детето во градинката. Таа додава дека имаат доволно воспитувачи и оти децата од ниту еден аспект не ја чувствуваат пренатрупаноста.

- Мојата ќерка има три години. Со врски ја запишав во градинката, но сега гледам дека згрешив. Таа е труматизирана. Проблемот не е во вработените. Тие сакаат да помогнат, но реално немаат време оти имаат премногу деца на грб. Воспитачките се искрени, ми кажуваат што се случува, но тоа не е оправдување - вели една мајка што го носи детето во градинката „Срничка“. Во Законот за заштита на децата се направени дополнувања и се поставени нормативи и стандарди кои приватните градинки треба да ги исполнуваат за да влезат во евиденцијата на Министерството, а со тоа да ги следат прописите што важат и за државните градинки.

Марија ТАсев