ВМРО-ДПМНЕ или СДСМ?

И како по обичај...си претат со тужби... бараат експертски мислења... кукаат...а истото го правеа и тие...е тоа многу ми смета...Не ги оправдувам овие од власта...ама не можам ’’да ја проголтам’’ нити опозицискава демагогија... А го личи, ли го личи  Никола со лопата...па па паа, па и министерот за образование Перо Стојановски.

Само навидум е законска кампањата и силната медиумска пропаганда што ја водат членови на Владата, тврдат стручњаци за борба против корупцијата

Експерти од опозицијата подготвуваат кривични пријави против членови на Владата поради злоупотреба на службената положба и користење буџетски пари за кампањата што ја водат во интерес на одредени кандидати.

- Кога некој функционер ќе употреби државни пари и средства за нечија корист има класична злоупотреба на службената должност. Тоа е дело што Јавниот обвинител мора да го гони по службена должност. Така функционерите им создаваат привилегирана положба на одредени кандидати за градоначалници и советници, настапуваат со полициска придружба, во службено време и слично - велат тие. Интензивната кампања, проследена со силна медиумска пропаганда, која ја водат членови на Владата само навидум е законски покриена, тврдат стручњаци за борба против корупцијата.
Законот за спречување на корупцијата во членот 11 забранува користење државни и пари од јавни фондови и претпријатија за изборна кампања, односно почнување изградба на патишта, водоводи, далноводи, канализација, училишта, градинки и други објекти. Но, тој предвидува исклучоци: „освен ако за таа намена претходно се обезбедени средства од буџетот, односно се работи за реализација на програма донесена врз основа на закон во тековната година“.

На тоа „освен“ се повикува и антикорупциската комисија, која смета дека во изборниот период може да продолжат сите активности на државните и локалните власти кои се однапред планирани и за кои има утврдени рокови за реализација и обезбедени пари во буџетот. Но, поранешниот претседател на Комисијата, адвокатот Драган Малиновски прашува каде е етичкиот однос на учесниците во кампањата и дали не станува збор за суптилно изигрување на Законот.

- Како сите „однапред“ планирани активности на државно и локално ниво се концентрирани токму во март? Многу поедноставено е гледиштето дека законот не се крши ако во изборен период се одвиваат однапред планирани активности. Зашто, истиот закон предвидува и совесно и законито вршење на функцијата, што значи таа да не се користи за прибавување корист за себе или за друг. А во случајот активностите на Владата се во корист на одредени кандидати. Ако се има предвид и силната медиумска кампања што ги следи активностите на Владата, сликањата при фрлање лопати, станува јасно дека целта не е локалното патче - вели Малиновски.

Премиерот Никола Груевски најави проекти, кои ќе почнат деновиве и во периодот помеѓу двата изборни круга: главната делница меѓу Радовиш и Струмица, патот за Кожув, патот Банско-Куклиш...

Никола Тупанчевски, професор на Правниот факултет, смета дека во случајов најбитна е етичката димензија, бидејќи таквите активности може да се протолкуваат како влијание врз гласачите.

- Треба да се има доблест и активностите, колку и да се однапред планирани, да се одложат. Државата нема да пропадне ако почнат по дваесетина дена. Индикативно е како сите тие бројни проекти се планирани токму во изборниот период, а станува збор за редовни избори за кои се знаеше кога ќе бидат одржани. Во целиот досегашен мандат на оваа Влада немаше толку активности колку што ги има сега во изборниот процес - вели Тупанчевски.

(Н.Н.С.)
Фото Чедомир Ненковиќ