Има ли корупција на универзитетите во МК

Дека професори на факултети секојдневно се поткупуваат за преодна оценка во индекс со години е јавна тајна, но според познавачите на состојбите, студентите ретко се одлучуваат да ги пријават, пред се, поради страв. За социолозите, студентскиот страв е последица од минатото кога авторитетот на професорот бил поголем дури и од тој на родителите. Тие тврдат дека универзитетските професори тоа добро го знаат и ја искористуваат дадената ситуација, наплатувајќи за шестка. Социолозите сметаат дека студентите, пак, за да не ја повторуваат годината, излезот го бараат преку корумпираниот универзитетски систем. - Колото на факултетите се врзало уште во почетокот на транзицијата. Првата алка е малата плата на професорите, а втората е неефикасноста на полицијата и на обвинителството во откривањето на тие случаи. И така се се врти во круг со години иако цел свет знае дека секој втор професор бара пари за оценка во индекс “ тврди социологот Анета Поп-Илиоска. Практиката покажува дека поткупот во високото образование постои одамна, но само еднаш во годината ќе се појави студент кој ќе пријави професор и ќе потсети дека долгогодишниот проблем е тука. На корупцијата низ факултетите минатата недела потсети и студентка од Филолошкиот факултет, на која за шестка професорот и побарал 600 евра. Од Министерството за образование овој случај го окарактеризираа како еден од ретките, што не навестувало дека и останатите професори се корумпирани. Студентите, пак, за поткупувањето, според невладините организации, зборуваат само во ходниците на факултетите и во студентските домови. Тие тврдат дека нивната пасивноста се должи на незаинтересираноста на надлежните институции и слабите механизми за нивна заштита. Се плашат дека ако пријават случај на поткуп, ќе имаа проблеми со другите професори, па затоа не сакаат да ја ризикуваат иднината. Резултат во борбата со корупцијата не донесе ниту телефонскиот број кој го промовираше Министерството за образование затоа што никој не одговара на повиците на студентите. Не беше ефикасен ниту телефонскиот бројот кој го обезбеди Студентскиот парламент. За беспомошноста на студентите придонесува и фактот дека речиси цела година се оставени без студентски правобранител, чијашто функција е да им помага и да се бори за нивните права. Невладините организации објаснуваат дека студентите со својот страв прават чекор назад во борбата со корупцијата, а тоа уште толку ги охрабрува поткупените професори, кои постојано се усовршуваат за таа „дејност“. - Парите одамна веќе не се ставаат во индекс, туку поткупувањето се врши преку повеќе посредници за да се покријат трагите, кои на крајот, сепак, завршуваат во рацете на професорите. Исто така, исплатата се врши и преку жиро-сметка, а цените се најразлични и зависат од видот на студиите, но и од сесијата. Така цените се движат од 200 до 2.000 евра за шестка - објаснуваат студенти, кои од страв сакаат да останат анонимни. И невладините организации преку неколку истражувања за корупцијата во високото образование се обидоа да им помогнат на студентите и да го обелоденат овој проблем, но професорите и ректорите ги прифаќаа нивните истражувања како паушални и неаргументирани, а надлежните бараа директни посочувања и сведочења.