Турција (Анталија)

Пријателска Турција е изборот за годишен одмор на голем дел од министрите, како и на премиерот Никола Груевски. Од министерските кабинети нагласуваат дека министрите заминуваат на одмор во пријателска Турција. Премиерот Груевски е веќе заминат во Турција. Тој неколку дена ќе помине во Анталија. Таму е и шефот на македонската дипломатија Антонио Милошоски.
- Министерот со своето семејство е заминат на годишен одмор во пријателска Турција - ни изјавија од Кабинетот на Милошоски.

Во Турција ќе оди и министерот за одбрана Зоран Коњановски. Но тој заминува на продолжен викенд.
- Ова лето министерот Коњановски нема да го користи својот годишен одмор. Тој ќе има само два продолжени викенди. Едниот ќе го помине во Охрид, а другиот во пријателска Турција - велат од Кабинетот на Коњановски.

На одмор е заминат и новиот министер за земјоделство, Љупчо Димовски. Откако пред неполн месец беше назначен за министер, Димовски почна да го користи годишниот одмор. Од неговиот Кабинет велат дека годинава тој ќе остане во Македонија. Годишниот одмор го користи и министерот за економија, Фатмир Бесими, но од неговиот Кабинет не откриваат каде ќе се летува министерот. Од работните обврски зема здив и министерот за транспорт и врски, Миле Јанакиевски.

Само со продолжен викенд од 5 дена летово ќе го помине и министерот за правда Михајло Маневски. Тој вели ќе замине во Охрид да земе малку здив, а остатокот ќе го помине работно.
- Има многу работи кои мора да бидат завршени. Ќе заминам неколку дена во Охрид, но главно август ќе биде работен месец за мене - вели Маневски.
Плажа, сонце, слободни денови нема да има ниту вицепремиерот за евроинтеграции, Васко Наумовски. Тој вели летово ќе остане во Скопје, работно, пред извештајот кој Македонија го очекува од Европската Комисија.

Нема одмор ниту за министерката за култура, Елизабета Канчевска Милевска. Од нејзиниот Кабинет велат дека работните обврски не и дозволуваат на министерката да замине на одмор. И новиот министер за образование и наука, Никола Тодоров.

Годишниот одмор го користи и претседателот Ѓорги Иванов. Тој со своето семејство деновиве е во Охрид. Сепак, од неговиот Кабинет велат дека, и покрај тоа што е на одмор, има работни активности и сега.