ПРЕГОВОРИ ЗА ИМЕТО - 1

Нимиц растревожен од Петров

Посредникот во македонско-грчкиот спор за името се интересирал дали заменикот-министер употребил збор „небулозни“ за неговите предлози

Информиран дека ставовите на Петров не се ставови и на МНР и дека Македонија останува во преговорите под негово водство: посредникот Метју Нимиц

Посредникот во македонско-грчкиот спор за името Метју Нимиц реагирал до македонската страна по завчерашниот истап на заменик-министерот за надворешни работи Зоран Петров, кој на трибина на Демократскиот сојуз побара редефинирање на преговарачкиот процес и нов мандат за преговарачот.

Неофицијално дознаваме дека Нимиц се интересирал за точните квалификации што Петров ги употребил за да опише дека предлозите на Нимиц биле најлоши досега. Конкретно, посредникот Нимиц во реакцијата до македонскиот преговарач Зоран Јолевски прашувал дали е точно дека заменик-министер го употребил зборот „небулозни“ за предлозите за решението на спорот. Според сознанијата, од македонските дипломатски кругови му било одговорено по проверката на стенограмата од излагањето на Петров и било утврдено дека Петров сепак не дал таква квалификација.

Македонското МНР вчера се дистанцира од истапот на својот функционер на партиската трибина на неговата партија Демократски сојуз. Македонија ќе продолжи да учествува конструктивно и аргументирано во разговорите со Грција за името под патронат на ООН и нема промена во ставовите. Ставовите на Петров беа негови лични видувања искажани на партиската трибина - изјавија во Министерството за надворешни работи.И Петров вчера изјави дека искажаните оценки биле негов личен став.

- Тоа што го кажав на трибината беше мој личен став, моја лична оценка. Јас имам право на тоа бидејќи само ги констатирав фактите за блокадата во преговорите. Нека ми докаже некој дека не е така. Тоа двапати досега го кажа и шефот на државата Бранко Црвенковски, кој уште во 2007 година рече дека Нимиц излегол од рамката за преговори. Истата оценка еднаш ја искажала и грчката министерка за надворешни работи Дора Бакојани. Тоа не е моја измислица бидејќи преговорите се во ќор-сокак. И како тогаш тие може да тргнат напред? Треба да се размислува за нивното редефинирање, оти процесот е исцрпен. Како тоа би се направило треба да се види, дали за тоа ќе размислува посредникот Нимиц или генерален секретар на Обединети нации - изјави вчера Петров.

Тој рече дека пред истапот не се консултирал со министерот Антонио Милошоски или премиерот Никола Груевски.Петров завчера на јавната трибина посветена „Спорот за името“ изјави дека е „дојдено време за реформа на преговарачкиот процес“.

- Посредникот ги исцрпил своите капацитети, а процесот од застој влезе во блокада. Потребно е реформирање на процесот што не значи дека тие мора да се прекинат. Преговорите излегле од својата првична рамка Резолуцијата 817 на ОН и се прошириле со Резолуцијата 845 и Привремената спогодба - изјави на трибината Петров.

Бранко Ѓорѓевски