РАМКОВЕН ДОГОВОР?!

ОФИЦИЈАЛНА ТИРАНА

Неспроведен рамковен значи поделба на Македонија

Ако не биде спроведен Охридскиот договор, Македонија ќе биде поделена меѓу двете најголеми етнички групи Македонците и Албанците

Ако не биде спроведен Охридскиот договор, Македонија ќе биде поделена меѓу двете најголеми етнички групи во државата - Македонците и Албанците, е оценката на Кочо Данај, политички советник на албанскиот премиер Сали Бериша. Во интервју за приштинскиот весник „Епока е ре“, што го пренесува агенцијата Танјуг, агенцијата МИА пренесува дека Данај изјавил дека Охридскиот договор бил само „лоша камуфлажа оти е во корист на Албанците“, а оти со него всушност Македонија била спасена од распаѓање.

- Најголема закана за неспроведувањето на рамковниот договор со кој беше окончан вооружениот конфликт во 2001 година, е враќањето на ВМРО-ДПМНЕ на власт, чиј поранешен лидер и премиер Љубчо Георгиевски заговараше поделба на Македонија - наведува Данај. 

Според него, Македонија не била поделена во 2001 година бидејќи во тоа време се' уште не беше отворено косовското досие.

- Сега ова досие е пред затворање. Како што стојат работите, потребно е во македонската влада да биде, како што и е, една албанска политичка партија со национална програма, како што е ДПА, а не граѓанска партија како ДУИ - вели политичкиот советник на албанскиот премиер Бериша.

Данај смета дека ако ЕУ и САД и' дозволија на Црна Гора со 600 илјади жители да стане самостојна држава, тогаш не би требало да има проблеми за Македонија со нешто повеќе од милион жители и одвојувањето на дел од нејзината територија на кој живеат неколку стотини илјади Албанци.

Политичкиот советник на албанскиот премиер Сали Бериша, во интервјуто за „Епока е Ре“ предвидува дека поделбата на Македонија би можела да се случи меѓу 2010 и 2012 година.