ИЗБОРИ 2009 - генерална дискусија

Експертите прават профил на идеален претседател

Универзитетски професори, поранешни амбасадори и министри, кој ќе седне на претседателското столче во мај. Во игра се седуммина, за петгодишен мандат. Но пред некој да седне на шефовското столче ќе треба да ги убеди граѓаните да го заокружат неговото бројче.

И за муабетот на митинзите да не се сведе на „ќе направиме локален пат од стотина метри до евроатлантската перспектива на нашата земја“, ги прашавме познавачите како треба да изгледа претседателската кампања.

„кандидатите за претседател треба да се движат во надлежностите кои ги има претседателот на Република Македонија во склад со Уставот и со законите. Доколку излезат од тој делокруг, тогаш зборуваме за содржинска манипулација, односно се обидуваат да ги изманипулираат граѓаните дека ќе направат нешто, но тоа нешто не е во нивен домен“ изјави Јован Ананиев, универзитет „Гоце Делчев“, Штип.

Избори не ни се случуваат прв пат, експертите апелираат кампањите да не се сведат на ветувања кои не се во надлежност на шефот на државата, манипулацијата може да им се врати како бумеранг.

„Претседателот треба да соодветствува на тоа што го претставува. Нашите претседатели по некој пат, а имаме впечаток дека претставуваат некоја држава од многу милиони луѓе. Ние си ги имаме вредностите, меѓутоа сите тие комплексни нешта, сето тоа што е претставување на државата, треба да соодветствува со нашата култура и да биде реално“, вели Зекман Ракиповски декан на факултетот за дизајн и мултимедија, ФОН Универзитет.

И кога ќе бидат очи в очи со народот, освен убедително да зборуваат, како треба да изгледаат?

„Не гледам дека треба било каква ознака на партија да се носи. Ако веќе зборуваме за претседател, тој е претседател на сите луѓе во државата, и облеката како една социолошка појава да ја кажам, мислам дека во тој случај, треба да е прилагодена на професијата, а тоа значи дека треба да зрачи со моќ претседателот, со доверба. Значи прво да го слушнеме, а не прво да приметиме во што е облечен“, рече Лира Грабул моден дизајнер и костимограф.

Дали ќе се гласа за боја, партија или личност е одлука на граѓаните, но избраникот посочуваат експертите не треба да заборава дека ќе биде претседател на сите.