Кодекс на пристојно однесување

Наставник со измама земал плата од две работни места

Наставникот во Основното училиште „ Х.Т. Карпош“ во кривопаланечкото село Ранковце, И.С. (41), добил кривична пријава бидејќи истовремено земал плата од две работни места во Министерството за образование и наука. Освен како наставник, осомничениот работел како советник во Државниот просветен инспекторат. Полицијата го пријавила осомничениот за измама, а кривична пријава за злоупотреба на службената положба и овластување добила директорката на училиштето, С.Н. (34), која не го пријавила случајот, иако знаела дека наставникот работи на две места.

Осомничениот, инаку секретар на Општинската организација на ВМРО-ДПМНЕ во Ранковце, од јануари до октомври лани бил во редовен работен однос во училиштето како наставник по одделенска настава. Тој редовно земал плата иако воопшто не се појавувал на работа. Наставникот во училиштето бил пријавен дека е на боледување, а во Министерството за образование било прикажувано дека користи оправдано неплатено отсуство. Тој во меѓувреме се вработил со договор за дело во истото министерство, како советник во Државниот просветен инспекторат, од каде што исто така редовно примал личен доход. Со ваквата злоупотреба тој незаконски за себе пријавил 179.000 денари.

Директорката на училиштето, иако знаела дека тој работи на друго работно место, не презела никакви законски мерки. Осомничениот дури и во нејзино присуство, во повеќе наврати вршел контроли во училиштето како вработен во Инспекторатот, а таа и понатаму ги потпишувала платните налози за исплата на неговата плата.На тој начин директорката го оштетила училиштето за 199.000 денари.

Полицијата поднела кривична пријава и против сопругата на Иво С., Д.С.(36), но, за друг случај. Таа е осомничена дека фалсификувала диплома за завршено средно образование, трет степен, со која се вработила во подрачната единица на ПИОМ во Крива Паланка. Дипломата била на нејзиниот брат, а осомничената во документот ги внела своите податоци.