Прилеп

Сто и педесет прилепски домаќинки во вторникот приготвија 80.191 сарма кои се вареа на пет локации во градот - во кујните на Старскиот дом, во две градинки, во домот на интернатот Орде Чопела и во кујната на фабриката за конзервирање на зеленчук и печурки во чии ладилници се чуваат до утрешната прослава.

- Ги исполнивме сите услови. Има и видео материјал, целиот процес го контролираа санитарната инспекција, Дирекцијата за храна и Заводот за здравствена заштита. Мислам дека ќе ни биде признат гинисовиот рекорд, нагласува Ане Лашкоска шеф на Кабинетот на прилепскиот градоначалник. За приготвување на сармите се потрошија 700 зелки и над 90 килограми ориз.

За време на утрешната прослава на празникот Свети Никола булеварот во центарот на градот ќе биде затворен. Таму ќе бидат поставени  војничките казани во кои ќе се варат над 200 килограми  грав. За прославата ќе бидат обезбедени и над 50 килограми риби и буриња вино.

Утре изутрина свечена литургија ќе се одржи во црквата Благовештение, а прославата продолжува пред параклисот на Свети Никола во центарот на Градот каде ќе бидат поставена и богатата трпеза.