ПОМОШ- ИДИВИДИ ОРДИНАЦИЈА

Хуман папиломавирус (ХПВ) е честа инфекција која ги зафаќа кожата и слузниците по телото. Поточно, терминот ХПВ се однесува на група вируси. Тие се наречени папиломавируси бидејќи одреден број од нив предизвикуваат брадавици по телото на човекот или медицински наречени папиломи.
Досега се идентификувани околу 100 различни типови на ХПВ вируси, а околу 30 од нив се пренесуваат со сексуален однос. Оние типови кои се пренесуваат преку гениталиите се нарекуваат генитални ХПВ, а болестите кои ги предизвикуваат спаѓаат во сексуално преносливи болести. Според едни податоци дури 50 % од сексуално активните лица ќе развијат инфекција со ХПВ во одреден момент од својот живот.
ХПВ се разликува од гениталниот херпес, кој исто така претставува вирус што се пренесува со сексуален однос ( сексуално пренослива болест). Сепак, гениталниот херпес предизвикува појава на мали меурчиња или ситни ранички на гениталната слузокожа, додека ХПВ предизвикува појава на израстоци наречени брадавици, медицински познати како condylomata acuminatum. Одредени типови на ХПВ можат меѓутоа да предизвикаат појава на цервикална дисплазија- променета слузница на вратот на матката со поенцијал да се трансформира во вистински рак на грлото на матката. Во обата случаи, жената може воопшто да не осеќа никакви тегоби. Не постои лек за ниту една од овие болести, но во најголем број од случаите на инфекција со ХПВ, имуниот систем на организмот успешно се бори со вирусот и на крај успева целосно да го отсрани вирусот од себе. За разлика од ХПВ, гениталниот херпес вирус има тенденција да се скрие и долго да мирува во организмот (најчесто во нервните клетки) и чека погоден момент кога повторно ќе се активира.
Некои типови на ХПВ предизвикуваат брадавици на рацете и нозете. Само неколку типови предизвикуваат брадавици на гениталните слузници. Одредени типови меѓу нив, познати како ХПВ со висок ризик, се главен ризик фактор за појава на рак на грлото на матката. Неколку испитувања покажаа дека ХПВ инфекциите играат улога и во настанување рак на анусот, вагиналните усни и пенисот, како и на одредени облици рак на устата и голтникот.
Повеќето од жените кои порано имале генитални брадавици (но во моментот ги немаат) нема да имаат проблеми за време на бременоста или кога ќе се пораѓаат. Но, доколку гениталните брадавици се појават за време на бременоста, тие можат значително да пораснат и да прокрварат. Ваквите брадавици кои имаат тенденција побрзо да растат за време на бременоста може да го попречат актот на мокрење. Понекогаш ваквите брадавици бараат да бидат отстранети за време на бременоста, особено доколку нараснале до толкава мерка со што сериозно го блокираат патот преку кој ќе се одвива породувањето.
Во поретки случаи, бремената жена може да го пренесе ХПВ на нејзиното бебе. Како резултат на ова, брадавици можат да се појават во грлото на новороденото.