ГРЧКА ПРОПАГАНДА, притисоци, уцени, инциденти...

Во Македонија имало малтретирање грчки граѓани особено по самитот на НАТО во Бук*решт. Ова на грчките пратеници во писмо им го напиша Дора Бакојани, која кажа дека во Македонија живеат над 400 Грци. Според неа, услов за евроатлантските интеграции на Македонија е да ги почитува човековите права на Грците што живеат во државава. Ако Грција смета дека во Европа се оди со почитување на човековите права и самата нека ги почитува, реагираат од „Виножито“.

Оттаму и реплицираат на Бакојани со предлог да се направи попис во двете соседни држави со меѓународна арбитража под покровителство на ЕУ, за да се види колку Македонци има во Грција и колку Грци има во Македонија.

- Грчката филозофија е моето е мое, а вашето е пак мое. Од една страна не признава ниту едно малцинство во својата држава освен муслиманското, а од друга страна подгреана од националистите наоѓа фиктивни Грци во Македонија - смета Атанас Парисис од раководството на „Виножито“. Бакојани како одговор на пратеничко прашање на радикалите истакнува дека за Грците во Македонија се грижи Грција преку канцеларијата за врски во Скопје, особено по случувањата во Бук*решт. Скопје, Битола, Гевгелија и Пехчево се градовите што Бакојани ги навела со грчки топоними како места каде што Грците се организирани во свои друштва. Од „Виножито“ објаснуваат дека за Македонија би било позитивно Грците гласно да побараат признавање на нивните национални права, зашто тогаш би можело и ние да го побараме истото од Грција.

- Во Македонија граѓаните не се лишени од правото да си ја изразат националната припадност, а пример за тоа е што во центарот на Скопје има Здружение на Бугарите и се даваат бугарски пасоши - вели Парисис.

Неодамна и Панмакедонската организација во САД организира неколку протести со пароли „Засрами се, ФИРОМ“ преку кои побара Обединетите нации да се заложат Македонија да ги почитува правата на грчкото малцинство. Грчката канцеларија за врски вчера не даде одговор на нашето прашање дали имаат поплаки од Грците што живеат во Македонија. Од Хелсиншкиот комитет за човекови права објаснуваат дека досега ниту еден Грк не им се пожалил за такво нешто. Од Друштвото за македонско-грчкото пријателство тврдат дека Грците со кои тие контактираат ги имаат сите права. Ѓорѓи Доневски, претседател на здружението на децата-бегалци „Незаборав“, ја повикува Бакојани ако мисли дека има Грци во Македонија, да ги најде.

- Во тие 400 Грци ги бројат здруженијата на Власите и, што е најстрашно, и нас, децата-бегалци, на кои не ни даваат да се вратиме во родните огништа зашто имаме македонска свест - вели Доневски. Тој потсетува дека поранешниот грчки министер за надворешни работи Теодорос Пангалос во негово време дошол во Македонија и изброил 250.000 Грци.

Извори од невладина организација од Битола тврдат дека таму постојат околу четири здруженија на Власи што се декларираат како Грци и шират национализам. Во обид да стигнеме до некое од овие здруженија дознавме дека немаат канцеларија ниту, пак, е познато од каде се финансираат.

------------------------------------------------------------------------------------------