Црна иднина за Грција

Анализа од страна, кога аналитичарот е од трета, европска земја, која не е директно вклучена во спорот со Грција, не изгледа баш така како што грците сакаат проблемот да му го претстават на светот. Полека, полека излегува на виделина вистината за состојбите во Грција и убаво звучи кажано или напишано од некој од страна. Овојпат анализата е на новинар од германскиот  „ФРАНКФУРТЕР АЛГЕМАЈНЕ ЦАЈТУНГ“., кој дава одлична анализа на екстремниот грчки национализам:

 

 

 

Во Грција владее национално мислење дека македонското малцинство ниту постои ниту некогаш постоело. Поради тоа секое споменување за Македонците на северот од земјата во Атина предизвикува жестоки протести, пишува угледниот германски весник „Франкфуртер алгемајне цајтунг“ од 2 декември под наслов „Македонија не смее да постои“. Атина сака да го „блокира приближувањето на Македонија до Европската Унија“ ако не се откаже од своето име. Тој став на премиерот Костас Караманлис го поддржува и опозицијата, пишува весникот.

Под влијание на екстремно националистичка идеологија се сите области на јавниот живот, го цитира весникот грчкиот публицист Такис Михас, кој во 2002 година во САД ја објави книгата „Грција и Србија на Милошевиќ“ за заплетканоста на еден дел од политичката елита во Атина со режимот во Србија. Михас во Грција од порано се смета за предавник на хеленизмот и, според весникот, има големи неволји поради неговиот критичен став кон грчкиот национализам.

Грција за која пишува Михас не е Грција каква што се претставува во шарените туристички проспекти - Алексис Зорбас, сончеви брегови, Акрополис и Атина - напоменува големиот франкфуртски дневник.

„Михас пишува за општество натопено со национализам, кое брзо може да стане многу непријатно за секој што го оштетува лакот на таквото самопретставување. Тоа го потврдува случајот на Григорис Валијанатос, кој се' до пред еден месец беше советник за медиуми во ПАСОК на Андреас Папандреу и тоа уште од 1985 година. Валијанатос го изгуби местото поради невнимателна изјава во едно ТВ-интервју во кое го поддржа правото на Македонија да биде признаена од меѓународната заедница под нејзиното уставно име. Што е уште пострашно, тој изјави дека во Грција постои македонско малцинство“.

Ништо не помогна што Валијанатос нагласи дека е тоа негово лично мислење, а не став на неговата партија, заклучува весникот и истакнува дека веќе следното утро мораше да искуси дека во Грција не е препорачливо ни приватно да се признава постоењето македонско малцинство и правото на Македонија на државно име, пишува весникот во својата невообичаено остра критика на грчката политика кон Македонија.

- Кога се работи за таканаречените „национални теми“, објективноста не игра улога во Грција - оценува Михас. „Важно е известувањето да ги репродуцира национално коректните погледи. Кој не се придржува до тоа, може скапо да плати“, додава Михас.

Но, западноевропските новинари очигледно не се обврзани да се придржуваат до тие национално коректни погледи од Атина, па „Франкфуртер алгемајне цајтунг“ пред две недели објави репортажа за македонската заедница од северозападот на Грција, која живее до границата со Македонија. Германското радио „Дојче веле“ во својата програма на грчки јазик даде потоа краток приказ на таа репортажа, што предизвика реакции од грчка страна, кои беа директен повод за опширниот текст во франкфуртскиот весник.

Во својата критика на грчкиот национализам Михас е се' уште прилично осамен, но сепак се слушаат по некои слични гласови, пишува уште весникот и го цитира социологот Михаел Келпанидес од Универзитетот „Аристотел“ во Солун, кој вели „има длабоко националистичко и антизападно држење кај левите и десните елити во земјата, комбинирано со екстремно националистички дух на образовни содржини, каков што во Западна Европа никаде не постои“.