ЕП во ракомет за жени - Македонија 2008

ПО ПОРАЗОТ ОД ГЕРМАНИЈА, МАКЕДОНИЈА ДЕНЕСКА ВО НОВ ОБИД ДА СТИГНЕ ДО ПРВИТЕ БОДОВИ

Втора шанса, Хрватска

ДЕНЕСКА
СРБИЈА - ГЕРМАНИЈА 18:15
Сала:"Борис Трајковски" во Скопје
МАКЕДОНИЈА - ХРВАТСКА 20:15
Сала:"Борис Трајковски" во Скопје

На македонската репрезентација & се укажа мала шанса да дојде до изненадување на премиерниот натпревар со Германија, но не ја искористи. Премногу технички грешки, лесно загубени топки, ситуации кои останаа неискористени, а едноставно мораа да се искористат... премногу за противник од калибар на Германија, која иако збунета во скопската сала, едноставно имаше вишок на искуство и успеа да ја реши средбата во своја корист.
Денеска Македонија ќе има својата втора шанса да дојде до првите бодови. Играме со селекцијата на Хрватска, репрезентација која слично како и Германија ќе ја има улогата на фаворит во однос на Македонија, иако се игра на наш терен.
Претерани се коментарите од дел од македонските стручњаци кои сугерираат да се чуваат силите на овој натпревар за да може да се одигра на највисоко ниво, на тоа што треба да биде решавачки меч за нас, дуелот со Србија.

Хрватска покажа квалитет на мечот со Србија во првото коло, но покажа и многу слабости, пад на концентрацијата, се виде дека може да прима голови во серија. Веројатно се подготвуваат за амбиентот кој ги очекува денеска во се надеваме полна до "врв" сала. Во контекст на ова, влезни билети во претпродажба чинат 200, 300 и 500 денари, а на денот на натпреварот, пред салата, цената на билет е 600 денари.
Нивни адут се неколкуте победи над Македонија во подготвителниот период. Имаат сосема солиден состав чија амбиција е да стигне до битка за подиум. По стартната победа над Хрватска веќе се пласирани во главната рунда, но со евентуална победа денеска, во главната рунда ќе одат минимум со два бода на салдото.
"На првиот натпревар не одигравме најдобро што знаевме. Направивме премногу грешки кои сега ќе се обидеме да ги елиминираме и да стигнеме до првите бодови", изјави Наталија Тодоровска, ракометарката која одлично ги познава, но и многу добро ја познаваат во хрватскиот тим со оглед на тоа дека настапува за екипата на Подравка.
Во Скопје денеска ќе се игра и дуелот меѓу репрезентациите на Србија и на Германија. Бундес-тимот е голем фаворит на овој натпревар, а со оглед на поразот на Македонија на првиот меч, единствен резултат кој ни одговара е пораз на Србија.

КАПИТЕНОТ НА РЕПРЕЗЕНАЦИЈАТА ПРЕД МОЖНА ПРЕСЕЛБА

Ѓер со понуда до Тодоровска

Унгарскиот првак Ѓер, екипа која игра со Ѓ. Петров во групата, испрати конкретна понуда до капитенот на македонската репрезентација Наталија Тодоровска. Преговорите не се нови, но за време на првенствата е многу полесно да се стапи во контакт со бараната ракометарка.
"Имам понуда, и тоа доста добра. Не сум одлучила што да правам, рано ми е да носам вакви одлуки. Веројатно ќе го чекам крајот на сезоната, па ќе разговарам со управата на Подравка, па по тоа ќе видам што понатаму", изјави Тодоровска.
Тодоровска има 34 години, но и натаму е во одлична форма, па за очекување е наскоро Ѓер да ги интензивира преговорите за што побрзо да дојде до потпис.


РЕПРЕЗЕНТАЦИИТЕ СО СЕБЕ СИ ГИ ДОНЕСОА И НАВИКИТЕ

Данска подготвена за Божиќ

Доаѓањето на најдобрите европски репрезентации во Скопје и Охрид внесе живост и во хотелите и низ улиците.
Ова се сениорски репрезентации и сите си имаат свои навики и побарувања.
Репрезентацијата на Данска, односно пола од нивниот тим, во вторникот решија пешки да одат од "Борис Трајковски" до Континентал.
Целта, да ја прошетаат "пластичарската" улица во Скопје за шопинг. Данките изнакупуваа лампиони, украси, купија новогодишна елка и минаа добар дел од времето во украсување  на ходникот на целиот трет кат во Континентал каде што се сместени.

Франција со фото-ИД

Францускиот тим не ги украсил своите простории (засега), но "триколорките" имаат свој заштитен знак во хотелот. Секоја ракометарка има залепено своја слика на надворешната страна од вратата од хотелската соба во која спие.
Репрезентацијата на Унгарија, пак, ја има одбележано својата територија со големо знаме на кое сите се потпишуваат.

Германска медитација

Од репрезентациите кои имаат свои барања надвор од листите се Германките. Тие бараа продолжен кабел да им биде донесен во соблекувалната за да можат да го слушаат цд-то на кое "медитираат".