Машка мода

Дамки
Ако својот појадок, ручек или вечера ги понесете и на својата облека, обидете се барем да ги камуфлирате, а доколку тоа не ви успее, задолжително сменете го тој дел од гардеробата!

Големината сепак е важна
Потрудете се облеката која ја носите да одговара на вашата величина. Претесната или преширока облека тешко дека ќе остави позитивен впечаток на другите. Панталоните или фармерките не би смееле да одат повисоко од папокот и премногу ниско, а идеални се доколку лежат над колковите.

Чорапи
Белите чорапи кои ѕиркаат под оделото се најлошото модно злосторство. Запомнете, белите чорапи се дозволени единствено и исклучиво за спорт. Не заборавајте дека чорапите мора да ја следат бојата на кошулата и оделата. Со одело одговараат тенки еднобојни чорапи, а со фармерки се дозволени и поопуштени бои и материјали.

Чевли
Секој маж, особено оној чија работа бара носење на одело мора да внимава неговите чевли да бидат секогаш чисти и неоштетени. Во спротивно ќе оставите слика на човек кој не знае што сака од животот. Затоа, критички погледнете и анализирајте ги своите чевли па дури потоа облечете ги.

Бои и дезени
Во деловниот свет важи правилото: помалку е повеќе. Ако не сте сигурни во својата способност за комбинирање на бои и материјали, одлучете се за проверена комбинација со еднобојни парчиња. Што се однесува до деловниот изглед, пожелни се темните еднобојни одела, а сивата боја е идеален избор. За формална комбинација кошулата треба да биде бела или светлосина со не многу впечатлива вратоврска.
За дневната спортска варијанта, фармерките се добар избор бидејќи лесно се комбинираат со кошули, маички и џемпери.

Модни додатоци
Главен моден додаток за повеќето мажи е ременот. Во основа постојат два вида ремени: за одела и за лежерни комбинации. Оние кои се носат на одела не смеат да бидат прешироки ниту претешки, а големите токи со облик на змија, змеј и слично се тотално промашување. Ременот мора секогаш да биде во склад со чевлите.