Смеат ли политичарите...?

Одговорно тврдам дека сите исплати што се направени во Министерството за образование (МОН), додека јас бев министер се направени законски и врз основа на правилници, реагираше вчера Сулејман Рушити, поранешниот министер за образование, а сега пратеник во Собранието од партијата „Нова демократија“. „Нова Македонија“ завчера објави наоди од државниот ревизор според кои Рушити склучил договор за дело, и за учество во комисија за нострификација и незаконски му биле исплатени 89.000 денари буџетски пари.

Во извештајот на државните ревизори за работата на МОН кој се објави минатата недела, ревизорите утврдиле неконтролирано трошење буџетски пари во времето кога Рушити беше министер.

- Јас сум тука, не бегам од одговорност. Ќе почекаме јавното обвинителство да утврди дали исплатите за членовите на комисиите се правени законски. Јас сум убеден дека ќе се потврди дека сè е направено законски. И во Генералниот секретаријат на Владата, во самата Влада, како и во останатите министерства има комисии чии членови се исплаќаат од државниот буџет. Што е сето ова ако не политичка атака врз мене? - рече Рушити.

Тој додаде дека ќе ги врати оние 89.000 денари ако јавното обвинителство потврди дека ги зел незаконски.

- Во комисијата за нострификација на дипломи беа ангажирани видни универзитетски професори. Кој ќе ги плати нив ако не Министерството? Трудот на членовите на комисиите треба да се вреднува - додаде Рушити.

Во ревизорскиот извештај стои дека „извршена е исплата од 89.000 денари на министерот за образование, врз основа на договор на дело склучен меѓу министерството и министерот, со кој тој се обврзува да врши работи во Комисијата за нострификација на дипломи, стекнати во странство, што е спротивно на законите за основно и средно образование“.

Ревизорите констатираа неконтролирано трошење државни пари - 92 лица го оштетиле буџетот за 230.000 евра. Ревизорите им препорачаа на службениците да ги вратат незаконски исплатените хонорари што ги земале, како и да се напушти практиката да се земаат пари за ангажман кој спаѓа во редовните задолженија на вработените.