ПРЕГОВОРИ ЗА ИМЕТО - 1

Поранешни дипломати, актуелни амбасадори и луѓе што уживаат најголема доверба кај премиерот Никола Груевски се луѓето кои се наоѓаат на листата на најсериозни кандидати за нов македонски преговарач во спорот за името. Едно од најзвучните имиња што е ставено во барабанот за можен преговарач е тоа на актуелниот македонски амбасадор во Атина, Благоја Ханџиски.  За многумина можноста Ханџиски да биде преговарач е речиси невозможна, пред се поради неговата партиска припадност. Како што е познато Ханџиски е еден од „постарите“ кадри на СДСМ и за време на неговото владеење дури двапати беше министер. Ханџиски неколку пати ја истакнал добрата соработка што ја има со актуелната влада. Во исто време, Владата неочекувано летово му го продолжи мандатот на Ханџиски и за многумина тоа е сигнал дека Груевски е задоволен од неговата работа. Како поранешен министер за надворешни работи и одбрана, Ханџиски важи за човек кој одлично ги познава политички случувања кај нашиот сосед, а за неговото именување претседателот Бранко Црвенковски речиси сигурно нема да има ништо против. Покрај Ханџиски, се споменува и името на Ристо Никовски, кој важи за искусен дипломат. Тој е поранешен амбасадор во Албанија и во Велика Британија и често излегува во јавноста со тврди ставови околу нашата попустливост за прашањето за името. Во играта се споменува и актуелниот амбасадор во САД, Ѓорѓи Јолевски, кој би можел исто како и неговиот претходник Димитров, истовремено да биде и амбасадор во САД и преговарач за името. Имињата на Панде Лазаревски, првиот човек на Центарот за управување со кризи и советник на премиерот, како и професорот Ѓорѓи Иванов, исто така, се наоѓаат на листата за нови преговарачи и важат за луѓе кои имаат голема доверба кај премиерот. Единствено што се знае е дека Мартин Протоѓер нема да биде назначен за преговарач. Но, не се исклучува можноста тој сепак да остане вклучен во процесот на преговори.