Дали аболицијата е Да за криминалот

Со  одлука на претседателот Бранко Црвенковски од 28-ми овој месец, како што соопшти Министерството за правда, помилуван е Александар Велјановски од Охрид, кој  со пресуда на охридскиот Основен суд  од  24 јануари 2007 година, e осуден на казна затвор за тешко кривично дело „насилство  и продолжено кривично дело – предизвикување општа опасност“ во траење од една година и четири месеци. Тој со одлуката за помилување е ослободен од доиздржување на казната во траење од осум месеци.

Осудениот Велјановски кривичните дела ги сторил на 11 мај 2002 година во ноќниот клуб „Скај“ во Охрид, во кој биле присутни над 100 гости, предизвикал тепачка, нападнал повеќе лица фрлајќи по нив со стаклени шишиња и други предмети, со што предизвикал општа опасност за животот на луѓето. Откако оштетените избегале надвор од клубот, осудениот пред ноќниот клуб од огнено оружје – пиштол, испукал 2-3 к*ршуми, во момент кога во непосредна близина биле оштетените лица. Истата вечер осудениот извршил грубо насилство врз И. В., во моментот кога таа се обидувала да го напушти местото на настанот, на начин што во присуство на голем број граѓани, со тупаница го скршил предното десно стакло од возилото и низ скршеното стакло започнал да ја влече за коса, со намера да ја истрга од возилото низ скршениот прозорец и при тоа и откорнал дел од косата од главата.

- Претседателот на Република Македонија го помилувал осудениот  и покрај тоа што Министерството за правда дало негативен предлог за помилување со оглед на карактерот на кривичното дело што го сторил, ова од причини што претходно  осудениот бил условно осуден и против него се водела и друга кривична постапка, се вели во соопштението од Министерството за правда.

За кривичното дело за кое се водела постапка обвинетиот, со втора пресуда на Основниот суд - Охрид  од 2007 година,  е осуден  на единствена казна затвор од 2 години и 9 месеци за едно кривично дело - убиство на миг, и недозволено изработување држење  и тргување со оружје и распрскувачки материјали.

Осудениот на  4-ти март 2007 година во расправија со други лица се обидел да лиши од живот учесници во расправијата така што со пиштол марка „Смит–Весон“ што неовластено го поседувал кај себе, пукал преку стаклото на патничкото  возило и  на едно лице му нанел две прострелни рани, на двете натколеници, а на друго лице една прострелна рана на десна натколеница.

“Министерството за правда, како што стои во соопштението, и овој пат укажува дека ова е четврто помилување на лица насилници – повратници  и тоа  две лица осудени за „спречување на избори и гласање“  и две лица осудени за кривично дело  „Насилство“  по чл. 386 од Кривичниот законик. "Со помилување на насилници и повеќекратни сторители на кривични дела  се праќа лоша порака  до граѓаните на Република Македонија, се подриваат темелите  и целите на казнената постапка   за превенција и спречување на насилни кривични дела и заштита на граѓаните“, се вели во денешното соопштение од Министерството за  правда.