Каде на факултет?

И по третиот уписен рок интересот за студирање на машинските и техничките науки е мал. Па затоа најавените факултет за електро, машински и технолошки науки во Радовиш, Пробиштип и Виница ќе бидат дел од универзитетот Гоце Делчев од Штип. Ќе профункционираат и само дел од дисперзираните студии. Па така универзитетот св. Кирил и Методиј ќе отвори дисперзирани студии во Велес, Струмица и Штип. Ректорот на скопскиот универзитет вели дека таму се обезбедени услови за настава која треба да започне на 13-ти овој месец.

Проблеми со дисперзираните студии има и на битолскиот универзитет св. Климент Охридски. Дел од студентите привремено треба да студираат во Велес во основно училиште, а во Кичево во домот на културата. Студентите пак со друга стратегија за високото образование и студентскиот живот - велат потребно е да се формираат силни студентски центри.

Од анализите кои ги правеле студентите на терен велат дека се утврдило на студентите покрај образованието потребен им е и социјален живот кој во малите места недостасува. Затоа до Владата и Премиерот Никола Груевски ја предлагаат новата стратегија.

Голем број фалсификувани таксени марки, студентски индекси и легитимации, најразлични обрасци потребни на студентите од универзитетот Свети „Кирил и Методиј“ запленила полицијата во печатница во скопска Пинтија и во книжарница во трговскиот центар „Буњаковец“.

Драги Лазаров, сопственик на печатницата „Графохемија“, подолг период ги фалсификувал студентските обрасци и таксените марки. Парите наместо во буџетот завршувале во неговиот џеб. Пронајдени се и пет метални клишеа за печат на универзитетот.

Фалсификуваните материјали ги продавал преку книжарницата „Култура 2000“ на Бошко Милковски. Двајцата се уапсени, но се претпоставува дека мрежата е многу поширока.

„До Ректоратот на универзитетот Св. Кирил и Методиј испратено е писмо со кое е побарано да се извршат проверки на документите кои веќе се во оптек и циркулираат низ Универзитетот и се разбира, да се извршат проверки на службените печати за да утврдиме во колку случаи и дали дошло до претходни злоупотреби на фалсификуваните материјали“, рече Гордана Јанкуловска, министер за внатрешни работи.

Колкава е штетата во буџетот се уште се утврдува. Не се знае точната бројка на продадени фалсификувани таксени марки, но се знае дека во оптек биле пуштени околу 5.000 студентски индекси.