Деца со посебни потреби

Училишта не можат да одговорат на потребите на децата со посебни образовни потреби. Иако законот предвидел со деца со пречки во развојот да работат дефектолози, реалната слика е сосема поинаква.

Со овие деца работи само одделенскиот наставник, кој треба да им предава прилагодена програма.

„Во редовните основни училишта во коишто има вклучени деца со посебни образовни потреби, треба да биде примен и дефектолог којшто ќе работи и директно со децата, но и ќе им помага на наставниците што работат со овие деца“, рече Ристо Петров, Институт за дефектологија.

„За жал, сега се уште е тоа неостварено“, додаде Петров.

За да им се помогне на децата со посебни образовани потреби, освен во училиштата мора да се направат промени во целиот систем, велат експертите.

„Со организирање на државен буџет на национално ниво кој ќе ги обезбеди сите потребни финансиски средства за тие училишта, во смисла на обезбедување на специјализирани средства и помагала за децата со посебни потреби, и што е многу важно, мрежа на координација на професионалци коишто ќе бидат вклучени во овој процес, со нагласка на дефектолозите“, изјави Зора Јачева, Институт за дефектологија.

Министерството за образование проблемот го гледа во училиштата во кои има деца со пречки во развојот, а кои не бараат дефектолози.

„Самите училишта кои имаат потреба од вработување на дефектолог, потребно е да поднесат барање преку општините до Министерството за образование и наука за ние тоа барање да го разгледаме и да го одобриме вработувањето“, вели Маја Корубин, МОН.

И додека институциите не преземаат нешто, вратите на училиштата за децата со посебни образовни потреби ќе бидат затворени.

Или родителите ќе мораат од редовните да ги префрлат децата во специјални училишта затоа што со нив нема кој да работи.