Дали нафтата ќе поефтини или поскапи?

Нафтата поскапе на светските берзи како резултат на најавите дека на претстојниот вонреден состанок на Организацијата на државите-извознички на нафта (ОПЕК) ќе биде донесена одлука за намалување на дневното производство на енергенсот. Американската лесна нафта за испорака во ноември вчера поскапе за 1,87 долар на 73,72 долари за еден барел, откако во петокот нејзината цена се намали на 71,85 долар за еден барел. Европскиот „брент“ од Северното Море за испорака во декември поскапе за 1,60 долар на 71,20 долар за еден барел. Ваквиот пораст на цените на нафтата за повеќе од 1,50 долар следи по најавите дека на состанокот в четврток ОПЕК, која задоволува 40 проценти од светските потреби за нафта, ќе донесе одлука за намалување на квотите за дневно производство на енергенсот.

Цената на нафтата поради постојаното намалување на побарувачката, веќе од почетокот на идната година ќе се намали на 30 долари за барел, вредност што енергетската сировина последен пат ја имаше пред пет години, предвидуваат трговците со нафта.

Западни медиуми јавуваат дека во крајот на минатата недела на берзата во Њујорк се склучени договори за купопродажба на нафта во кои се смета дека февруарската цена за еден барел ќе биде 30 долари.