Финансиска криза во САД и Европа

 - Авионските летови кон и од Грција вчера беа прекинати, јавните услуги и банките беа затворени, а и градскиот сообраќај беше блокиран кога грчките работници излегоа на штрајк во знак на протест поради владината економска политика. Илјадници Грци излегоа на улиците во центарот на Атина за да се побунат против нацрт-буџетот за 2009 година за којшто парламентот ќе дебатира оваа недела. Тие исто така се лути на мерките за оданочување и приватизацијата на компаниите, како авиокомпанијата "Олимпик ерлајнс".
Синдикатите соопштија дека милиони луѓе излегле на улиците, и се упатиле кон парламентот блокирајќи го сообраќајот, удирајќи во тапани и извикувајќи: "Никогаш нема да помине!" Индустријалците изјавија дека немаат точна цирфа за бројот на штрајкувачи. Штрајкот, што го организираше синдикатот на приватниот сектор ГСЕЕ и неговиот државен пандан АДЕДИ, којшто опфаќа половина околу половина од грчката работна сила, ги затвори и училиштата и банките. Болниците работеа само со персонал за итни случаи, а и новинарите се приклучија во штрајкот, со 24-часовна блокада на информирањето.
Грција, која опфаќа околу 2,5 отсто од економијата во еврозоната, почнува да го чувствува ударот од падот на глобалната економија. Министерот за финансии Јоргос Алогоскуфис изјави дека Грција е подготвена да одвои 28 милијарда евра како помош за банките. Контролорите на лет прекинаа работа од 12 часот на пладне до 16 часот при што беа одложени сите, освен итните летови. "Олимпик ерлајнс" откажа 152 лета, а нејзиниот помал конк*рент "Ејџијан ерлајнс" откажа 46 домашни летови. Грчкиот премиер Костас Караманлис, чие кревко парламентарно мнозинство беше потресено од скандали, вети дека ќе преземе мерки за заштита на потрошувачите од порастот на цените и за компензација на работниците во приватните компании.