ХАШКИ СЛУЧАИ - ќе има ли судска завршница

 

Лидерот на ДУИ Али Ахмети ќе се појави и ќе одговара пред македонскиот суд ако се процесуира хашкиот случај „Водството на ОНА“.Ова го потврди самиот Ахмети наспроти претходните изјави што ги даваше додека беше во опозиција дека ќе одговара исклучиво пред Хашкиот трибунал. Ахмети вели дека во однос на „хашките“ случаи најмал проблем е дали нему ќе му се суди.

- Јас сум најмал проблем и ако се процесуира предметот „Водството на ОНА“, ќе се појавам пред суд. Ситуацијата со хашките предмети е многу тешка. Разговаравме со премиерот Никола Груевски, но се' уште нема договор за формирање експертска група што ќе го толкува Законот за амнестија. Сметам дека законот треба да го толкуваат домашни и меѓународни експерти. Постојано контактирам со претставници на ОБСЕ, НАТО, САД и на ЕУ. Убеден сум дека овие предмети подлежат под тој закон - вели Ахмети, но не ги открива ставовите на меѓународните претставници со кои контактирал за хашките случаи.

 

ЗА ШТО Е ОБВИНЕТА ОНА?

Македонските органи уште во 2002 година соопштија дека е отворена постапка против Али Ахмети, Фазли Велиу, Гзим Острени, Муса Демири, Шефит Џафери, Џавид Асани, Хисни Шаќири, Муса Џафери, Џевад Адеми, како и против Даут Харадинај и Мустафа Рустеми од Косово и други лица, бидејќи има сомневања оти создале злосторничка организација на терористички банди - ОНА со цел уривање на уставниот поредок на Македонија. Тогаш беше соопштено оти има информации дека тие организирале собирање пари преку разни фондови, во кои се слевал и валкан капитал од продажба на дрога, оружје и од трговија со луѓе, кои се користеле за набавка на оружје, муниција и на други воени средства, како и за ангажирање странски платеници.

Според официјални државни органи, вооружените терористички банди биле составени од поранешни припадници на УЧК од Косово, ОВПМБ од Јужна Србија, голем број платеници од странство, но и од врбувани и мобилизирани припадници на локалното албанско население. Вооружените банди илегално влегувале во Македонија и вршеле вооружени терористички напади убивајќи припадници на полицијата и на АРМ. Нив им се припишуваат напади на полициски станици, касарни, караули, објекти на државни органи, како и на електричните постројки, инсталации, железнички пруги, водоводни инсталации.
Дел од обвинувањата на сметка на тогашната ОНА и нејзиното водство се однесуваат и на тероризирањето на неалбанското население, убиства, киднапирање, малтретирање, ограбување на имотот. При тоа, македонското население од Липковскиот и од Тетовскиот регион, особено од селата Матејче, Брезно, Јадуарце, Сетоле, Лешок, Теарце, Отушиште, Доброште и други, насилно било протерано, а нивните куќи и имотот бил палени. Македонските органи ги товарат лидерите на ОНА и за сквернавење на верските објекти, цркви, манастири и џамии. Манастирот во Матејче „Света Богородица“, кој е споменик на културата заштитен со Закон, го користеле како терористичка база, што е спротивно на Меѓународната конвенција за заштита на културното наследство.

--------------------------------------------------------------------------------------------

 

Што значи сега ова? Што го натера да се предомисли па да дава вакви изјави? Дали претставниците на ОБСЕ, НАТО, САД и на ЕУ од кои барал мислење го убедија нивниот пациент- милениче дека ќе биде амнестиран, па ај сега ќе се правам малку херој? Или нешто друго е во прашање?...