Одмор во Албанија

Иако во туристичката индустрија во Албанија има повеќе од 138 илјади вработени, таа и натаму е нецелосно регулирана, а тоа ги плаши потенцијалните туристи што не се запознати со регионот, предупредија албанските туристички агенции преку балканската мрежа БИРН.
Туризмот бележи голем подем во последните неколку години во оваа соседна земја, во време кога државата полека излегува од тешкиот и честопати немирен транзициски период. Според податоците презентирани од Националната туристичка организација, од 627 хотели во државата, само 36 имаат соодветно рангирање. Повеќето од официјално проценуваните хотели се во околината на Тирана. Многу честа е појава во приморските туристички населби сопствениците на хотелите сами да си ги оценуваат и да си ставаат sвезди колку што мислат дека заслужуваат.
Покрај хотелите, Албанија, исто така, има 908 места за сместување со вкупно 33.943 легла.
Останатите бројки даваат уште полоша слика за албанскиот туризам.
Лани и годинава забележително се зголемува бројот и на македонски туристи што заминуваат на одмор во Албанија поради ниските цени и чистото море. Минатиот месец, според фреквенцијата на граничните премини, во Албанија отидоа на одмор околу 10 илјади македонски државјани.
Официјалната статистика на Албанија лани регистрираше повеќе од 1,6 милиони туристи, а оваа година се очекува таа бројка да биде уште поголема.
Сепак, иако албанската Влада соопштува статистички податоци за да покаже каков успех се постигнува во туристичката индустрија, туристичките оператори и лоби групи се жалат дека запоставената инфраструктура, особено лошите патишта, проблемите со комунална инфраструктура (немањето фекална канализација и колектори во приморските градови и проблемите со снабдување со електрична енергија), како и недостигот на реклами ја оставаат Албанија неколку чекори зад конк*рентите во регионот.
Ако се земе предвид извештајот од 2007 година на Светскиот економски форум за конк*рентноста во туристичката индустрија, Албанија е на 90-тото место на списокот од 140 држави.