Смеат ли политичарите...?

Телохранителите на премиерот Никола Груевски во средата вечерта се вознемирија кога три танчарки, кои ги забавуваа гостите на забавата на Сојузот на стопански комори (ССК), му се приближија на премиерот. Девојките беа дел од програмата за прослава на 4 - от роденден на ССК и на гостите им се придружија за време на паузата на бендот "Г Стринг", непосредно откако премиерот Никола Груевски, заедно со неговото обезбедување и придружбата, пристигна на журката.
Обезбедувањето не било навреме информирано дека гостите ќе ги забавуваат егзотични танчарки, познати како жадиња, кои на забавите доаѓаат облечени со темни долги наметки и така облечени чекаат да почне музиката. Ним им биле сомнителни забулените жени што се врткале меѓу гостите. Но, кога забулените гостинки ги фрлија наметките и со голите мешиња во ритам на музиката тргнаа кон премиерот, неговите телохранители застанаа пред него заштитувајќи го од танчарките. Тие му играа на претседателот на Сојузот Венко Глигоров кој тогаш беше заедно со премиерот. Потоа се измешаа со другите гости на кои им се бендиса изненадувањето и стомачниот танц.
Ни беше речено дека за жадињата реагирал и протоколот на премиерот кому исто така не му било јавено за сценариото за забавниот дел од програмата.
Сепак, драмата што ја направија луѓето на Груевски не ја прекина забавата. Напротив. Журката која претходно почна со огномет, продолжи до доцна вечерта. Премиерот Груевски не заигра со жадињата, но насмеан им плескаше.
Меѓу гостите беа и министерот за транспорт и врски Миле Јанакиески, директорот на Царинската управа Ванчо Каргов, како и експратеникот Есад Рахиќ.
Сојузот на стопански комори вчера го одржа и годишното собрание, на кое беа утврдени развојните правци за дејствувањето на ССК во иднина и беа разгледани мерки за подобрување на бизнис климата, за намалување на трговскиот дефицит, како и за зголемување на домашното производство.
Т. Јовановска