Коментари, мислења, анализи

Шпекулации за шеријатот

Најпосле „поволни“ ветришта во едрата на Македонија. По разочарувачките вести од Бук*решт и ветото од Грција - за се' што значи евроатлантски интеграции, по 8 мај македонските граѓани се посигурни. Со сиот демократски потенцијал институциите дојдоа до откровително искуство, радикални исламисти поврзани со Ал каеда, па дури и нејзини ќелии, се реалност во Македонија. На една инспиративна прес-конференција, подоцна бомбастично дотерана од страна на некои медиуми, Иво Котевски во име на МВР го откри Кувајт. Така млад и елоквентен тој ни кажа дека опасни типови од 2002 ни се шетале по маалото. Не заборави да ги спомне и трите елементи што најчесто се абат кога се зборува за муслиманите, кои размислуваат поинаку. Пари, ставови однапред осудени како радикални, а често и како тероризам и каузата воведување шеријатски систем, изјава срочена во стилот обвинет, осуден и казнет. Уште една епизода во сапунската теорија што почна со изјавата на заштитениот сведок од Студеничани за муџахедините и за стаповите. Најнедоделканото беше околу црната листа на ОН на организациите поврзани со Ал каеда, како и претензиите за воведување на шеријатот како државен систем во Македонија. За волја на вистината, организацијата за Оживување на исламското наследство (а не општество) од Кувајт е на таа листа, но со следниов детаљ, расформирани се две нејзини канцеларии во Авганистан и во Пакистан. Таа организација слободно работи во многу земји, функционира и во Кувајт, во државата чија улога во борбата против тероризмот (на кого еуфорично му се додава придавката исламски) е повеќе од очигледна, за тие што сакаат да видат. Како и да е, се работи за тенденциозна шпекулација со која на масата, медиумски (не)образована, ќе и' се даде до знаење за „шо се работе“. За бројките не коментирам, но се знае каков ефект имаат милиони евра што им се спомнуваат на луѓето што живеат онака како што живеат.

Кога се изговорија зборовите шеријат,менување на државно уредување, си реков: е на човечката глупост и' нема крај. Еден српски актер на ХТВ, ме потсети на една вистина која вели: со суштината не се прават компромиси. Се сетив и на расправата на Елијаде за мотивот на Исус, Божјиот мир нека е над него, околу потфатот враќање во Ерусалим, по неговото бегство во родниот крај, на крајот на која ќе рече: Исус, сакал својата порака да ја искаже во религискиот центар на Израел со цел да предизвика конечен одговор, во една или во друга смисла. Суштината на пораката на Исус го натера бескомпромисно да се соочи со конечниот одговор на општеството. Суштината на нашето верување, чиј интегрален дел и верозаконот „шеријатот“, сограѓанину мој, Котевски, е дел од исламот, чие слободно исповедање ни е гарантирано со устав. Секое искривување и злонамерно спомнување на светиот шеријат го сметам за навреда и обид и така искривената слика за исламот уште повеќе да се искриви. За дообјаснување на некои дилеми околу исламот, стојам на располагање. Сите исламски теолози се ангажираат во пропагирање на верата која во текот на историјата била пример на толеранција, на меѓурелигиска комуникација, на стимулација на научниот прогрес и други позитивни примери. Таа била, е, и ќе биде дел од реалноста на Македонија. И денеска е фактор на формирање здрави личности, носители на традицијата и исконските вредности, кои подобро ќе се соочат со предизвиците на постмодерната доба. Тоа го потврди и вашата влада, која инсистираше и го внесе верското образование во јавниот образовен систем. Добар потег беше и коригирањето на правилникот за работа на МВР, во врска со документите за идентификација. Стигматизацијата на религиски другиот, со конструкции што му припаѓаат на едно минато време, со цел истиот да се дискредитира е неморално и секако контрапродуктивно. Праведноста, и прифаќањето на сите граѓани како еднакви е суштината со која ниедна држава не треба да прави компромиси.

Амел к*ртиши, теолог и магистранд по социологија на религија