Внатрешни несогласувања во исламот

Бранко Ѓорѓевски

Исламската верска заедница во Македонија ќе треба да реши дали наскоро ќе дозволи исламските теолози од Јордан кај нас да ја објаснуваат "вистинската слика за исламот". Раководството на ИВЗ има и понуда за повеќе стипендии за македонските студенти што сакаат да студираат на универзитетите во Јордан. Ваква понуда, според информациите, му била доставена на в.д. реис ул улема на ИВЗ во Македонија Бахри Алиу при неодамнешната средба со јорданскиот министер за исламски прашања Фатах Салах.

Понудите биле за ширењето на "Аманската порака", односно, на пораките упатени од главниот јордански град во ноември 2004 година.

Актуелниот водач на исламските верници Бахри Алиу не се изјаснил веднаш за предлогот. Алиу вчера беше недостапен за коментар, а според последните информациите, тој ги посетил Обединети Арапаски Емирати. Според веста на јорданската агенција, Алиу се интересирал за договор со авиокомпанијата "Ројал јорданиан" за транспорт на македонските аџии за време на сезоната на аџилак.

Сулејман Реџепи, член на Ријасетот на ИВЗ, вчера го обвини Бахри Алиу дека со ваквите потези води "приватна кампања за да биде избран за поглавар на ИВЗ".

- Ријасетот не е известен за оваа посета и таа не се прави од името на ИВЗ. Да беше така, составот на делегацијата ќе беше поинаков. Колку што дознавме, тој успеал да организира неколку средби користејќи ги личните пријателства. Но, тој нема мандат да решава од името на целата заедница, особено не за доаѓање на некакви исламски научници од Јордан. Јас на тоа категорично ќе се спротивставам - вели членот на раководството на ИВЗ.

Според него, никогаш досега не се случило во Македонија да дојдат исламски теолози од арапски земји за да го "објаснуваат исламот".

- Ние сме земја со сопствена исламска традиција и сега нема потреба некој да ни го објаснува исламот. На крајот на краиштата, имаме свештеници, кои дипломирале на исламскиот универзитет во Аман и кои, ако ни е потребно, можат да ни ги пренесат тамошните искуства - вели Реџепи.

Алиу го посети Јордан во време кога во редовите на ИВЗ постои силен конфликт помеѓу радикалната и умерената струја во проповедањето на исламот. Поранешниот поглавар на ИВЗ Ариф Емини мораше да замине од функцијата, откако беше изложен на сериозни закани и оружени упади во неговиот кабинет од се уште неоткриени групи. Оружен упад имаше и на една седница на Собранието на ИВЗ. Поголема група имами, кои дојдоа во судир со овие групи, укажуваа дека напливот на радикализмот во ИВЗ се должи и на индокринацијата на студентите од Македонија, кои се школуваат на исламските универзитети во арапските земји. Во редовите на ИВЗ има повеќе свештеници што дипломирале теологија во блискоисточните земји. Повеќето од нив ги завршиле студиите во Саудиска Арабија, Египет, Сирија, Тунис...

Јордан, со околу 5,7 милиони жители, е една од поразвиените арапски земји и во која околу 92 отсто од населението се муслимани-сунити. Во групата на сунитски муслимани се и исламските верници од Македонија.