Демаркација на границата со Косово

Владата на Република Македонија очекува демаркацијата на границата кон Косово да почне и да заврши во најскоро време, рече денеска на прес-конференција владиниот портпарол Ивица Боцевски, одговорајќи на новинарски прашања.
- Се надеваме дека многу скоро ќе почне овој процес што е од круцијално значење за Македонија, за Косово и за меѓународната заедница. Македонската страна на мешовитата Комисија за демаркација е конституирана. Подготвени сме веднаш да почнеме со работа. Во моментот чекаме да бидат усогласени терминот и некои детали со косовската страна. Тоа го прави нашиот шеф на мисијата во Приштина Стојан Карајанов, истакна Боцевски.
Тој нагласи дека демаркацијата е едно од стратешките прашања поврзани со односите меѓу Македонија и институциите во Приштина.
На прашањето дали Македонија ќе го признае Косово пред демаркацијата, Боцевски го повтори ставот на Владата - дека многу внимателно и сериозно се следат настаните во регионот, а секоја одлука што ќе се донесе ќе се темели исклучиво на интересите на македонските граѓани, како и на македонските национални и државни интереси.
- Од наш стратешки интерес и од интерес на Косово е демаркацијата да заврши. Тоа е составен дел од планот на Марти Ахтисари што Македонија го прифати како основа за трајно и одржливо решавање на планот на финалниот статус на Косово, напомена Боцевски.