Кочани

Средновековните кули во Кочани најверојатно биле изградени во втората половина на 17 век, кога градот бил под османлиска управа. Влијание во изградбата имала ориенталната архитектура.

Според денешните наоди, во Кочани и неговата блиска околина биле изградени три средновековни кули, од кои две се наоѓаат во градот, распоредени од двата брега на Кочанска река, додека третата е лоцирана во селото Долни Подлог. Тоа биле беговски кули во кои можело да се живее. Всушност, кулите имале станбено-одбранбена функција, а едната се користела како саат кула. Саат кулата денес се наоѓа во непосредна близина на училиштето “Раде Кратовче“ и порано служела за звучно означување на часовите.

Изградени од масивни ѕидови од камен, тие останале како единствени белези од минатото во Кочани, иако со години наназад биле под удар на забот на времето. Во 1957 година, Републичкиот завод за заштита на споменици ги стави под заштита на Закон двете кули во градот.