СЕХА Регионалната лига ќе има македонски првак во своето прво издание, откако Вардар вечерва во второто полуфинале го совлада фаворитот Загреб (30-29) среде хрватската престолнина и утре во финалето ќе игра со Металург, кој попладнево беше за нијанса подобар од Татран (26-25).

Избраниците на тренерот Веселин Вујовиќ одиграа неверојатно квалитетен меч, особено во одбраната, тотално го искористија тоа што играчите на Загреб беа поизморени, ем од настапите во Лигата на шампионите, ем поради настапите на хрватските репрезетативци во квалификациите за ЛОИ во Лондон и на крајот славеа огромна победа во „Арена“, каде што во минатото, но и сезонава паѓале многу поголеми ракометни имиња од Вардар..

На целиот натпревар имаше неверојатно 21 израмнување на резултатот, ниту една екипа немаше повеќе од два гола предност во текот на мечот, а Вардар притисна кога најмногу требаше – во последните пет минути, кога од негатива од два гола, преминаа во водство кое до крајот успешно го задржаа.