Обединетата македонска дијаспора реагира на заклучоците на самитот на НАТО во Чикаго, оценувајќи дека со нив се одобрува грчкото вето за приемот на Република Македонија, и побара прекинување на разговорите со Грција за надминување на спорот за името.

- Загрижени сме поради точката 26 од заклучоците на самитот во Чикаго. Во неа се инсистира на взаемно прифатливо решение за прашањето за името, кои ќе се постигне во рамките на Обединетите нации како нов предуслов за членство. Оваа точка укажува дека единствениот начин Македонија да напредува е да го негира својто идентитет. Соединетите Американски Држави, Франција и Германија одбраа да ја игнорираат пресудата на Меѓународниот суд на правдата, кој пресуди дека грчкото вето е илегално прекршување на Времената спогодба од 1995 година. Самитот во Чикаго е пропуштена можност за Претседателот Обама да го испочитува меѓународното право и да ја засили регионалната безбедност, и тоа во време кога е многу потребно САД принципиелно да преземат водство, пишува во реакцијата на Обединетата македонска дијаспора.

Во реакцијата се наведува дека со одлуката на самитот во Чикаго се поткопува улогата на НАТО како заштитник на демократските вредности.

- Банкротираната грчка држава оставена без раководство ги манипулира своите доверители и ја нарушува безбедноста на Македонија, со тоа заканувајќи се на водечката мисија на НАТО, Европа да биде цела, слободна и во мир. ОМД ја почитува одлуката на македонската Влада да продолжи со реформите и покрај неправичните резултати од самитот на НАТО. ОМД го повторува својот одамна усвоен став дека Македонија мора веднаш да го прекине процесот на разговори под покровителство на Обединетите нации и да ги поништи сите други отстапки со Времената спогодба, вклучително и откажувањето од симболот на сонцето од Кутлеш. ОМД ја повикува македонската Влада да се откаже од барањето членство во НАТО и во Европската Унија, доколку продолжат да бараат Македонија да го смени своето име и националните симболи, или доколку не ги почитуваат македонскиот јазик, култура и наследство, пишува во реакцијата на Обединетата македонска дијаспора.

http://umdiaspora.org/content/view/666/1/