ФРЧКО претседателски кандидат на розите

Во врска со оставката на поранешниот министер за внатрешни работи постојат различни спекулации, без јавноста да знае што точно се случи. Актерите се живи и време е тоа да се расчисти, да се дознае вистината.
Да ве потсетам, осум години по атентатот, Киро Глигоров смета дека министерот за внатрешни работи не поднел оставка. Во јули 2003 г., за белградски НИН, во врска со оставката на министерот, тој го изјави следново: “Има разни прикаски, но јас не би се впуштал во тоа, бидејќи тоа се спекулации. Тогаш министер за внатрешни работи беше г-дин Љубомир Фрчкоски, универзитетски професор за меѓународни односи, кој не нашол за потребно да поднесе оставка, ако не за нешто друго, тогаш поради моралната одговорност, бидејќи тоа се случи среде бел ден, среде Скопје”.
Одредено појаснување, но недоволно, понуди пратеникот Никола Поповски, висок функционер на СДСМ во тоа време. По повод иницијативата за формирање Анкетна комисија за утврдување на извршителот на атентатот, на пленарната седница на Собранието на РМ во април 1996 г., тој го кажа следново:
“Оставката, понудената, прецизно да разговараме, понудената оставка од г-дин Фрчкоски, јасно ја лоцира одговорноста за атентатот. Тоа јасно беше кажано. Тој ја презема врз себе одговорноста. За нас таа е битна. Фактот што господинот премиер не му ја прифати оставката, укажува дека премиерот во тој момент ја префрлил одговорноста од сопствениот министер врз себе. Како Собранието натаму ќе одлучува во врска со тие прашања, е работа на ова Собрание”.

ПОЛИТИКА НА ТИ-ДАЈ МИ
Претседателот Глигоров зборува за поднесена оставка - формулација што ја познава Уставот. Притоа тврди дека министерот не поднесол оставка. Од друга страна, пратеникот Поповски зборува за понудена оставка – формулација што не ја познава Уставот. Тој тврди дека министерот понудил оставка, но дека премиерот Бранко Црвенковски не му ја прифатил.Од гледиште на Уставот на РМ, оставката се поднесува, а не понудува. Тоа е така затоа што оставката е морален чин за чија судбина никој нема право да одлучува, освен подносителот. Кога се дава оставката, таа е еднократна и конечен чин на слободната волја на оној што ја поднесува. Со ваквиот карактер на оставката на преден план доаѓа моралната одговорност на конкретната личност, а не политичката одговорност.

Но, да се вратам на изјавата на Никола Поповски. Тој јасно тврди дека премиерот ја префрлил одговорноста за атентатот од министерот врз себе. Со изјавата за префрлување на одговорноста од министерот врз премиерот, Либералната партија го повлече предлогот за истрагата на атентатот. Тоа е време кога ЛП е дел од владејачката коалиција и кога претседател на Собранието на РМ беше Стојан Андов. Дека нешто не е во ред покажува повторното поднесување на предлогот за формирање на анкетната комисија за атентатот во 1998 г., од страна на ЛП, кога таа е дел од опозицијата и кога претседател на Собранието на РМ беше Тито Петковски. Предлогот е одбиен од парламентарното мнозинство, што само по себе зборува дека СДСМ има тврд однос кон атентатот. Иако станува збор за личност која долго време беше многу блиска до СДСМ и до вашата влада.

Време е да ви се постави следново прашање: зошто вие, господине Црвенковски, ја префрливте одговорноста за атентатот од министерот врз себе кога го немате тоа право и зошто сметате дека министерот нема морална и политичка одговорност за атентатот?

Јавноста исто така треба да знае зошто СДСМ, кога вие бевте негов лидер, не го дозволи формирањето на анкетната комисија за испитување на атентатот, и во 1996 и во 1998 г.?
Дали е во прашање политиката на дајми–дајство, политика што претседателскиот кандидат ја следи како животно кредо, не само кога беше во власта, туку и на факултетот?

Дали е логично поддршката на претседателскиот кандидат да ја правдате со тоа што тој е борец на политичката сцена кога и вие, лично, бевте подолго време изложени на груби напади од негова страна? Знам дека имате негативно мислење за моралните квалитети на кандидатот што го поддржувате. Тоа лично ми го рековте по вашето враќање од службената посета на Република Бугарија пред неколку години.

Вашата поддршка на претседателскиот кандидат ќе ви го намали уште повеќе и така слабиот авторитетот во СДСМ и македонската јавност. Немавте потреба да поддржите таква личност, бидејќи имате голем број други кандидати кои поуспешно би ги застапувале интересите на вашата партија....