Спречени два обиди за атентат врз Груевски

 

 

... Според доверливите информации до кои дојде весникот, животот на премиерот бил загрозен два пати: првиот обид бил кон почетокот на 2007 година, кога безбедносните служби добиле дојава од своите колеги од една западно европска земја дека емисари од Македонија биле кај нив во потрага по извршители на атентатот. По проверката на информациите се открило дека се работи за група од македонското подземје, притисната од одредени апсења и закани за нивниот бизнис. Било утврдено дека станува збор за веродостојна закана, по што биле поставени снајперисти во зградите околу станот на Груевски. Некои од можните извршители биле повикани на разговори во МВР, но набргу пуштени поради недостиг од докази. Мотивите за овој случај биле чисто криминални.

 Вториот случај бил многу поопасен, поттикнат од политички мотив. Била добиена информација дека во една од соседните земји се кове заговор како да се убие македонскиот премиер. Нашиот извор не сакаше да обелодени за која земја станува збор и зошто некој во соседството има таков мотив... Повторно биле повикани снајперисти, движењето на премиерот било сведено на минимум, односно биле откажани сите посети на необезбедени места... трасата по која се движела колоната возила била менувана многу често. И во двата случаи никој не е уапсен и против никого не е поднесена кривична пријава. Проблемот е што иако информациите биле проверени, многу тешко можело тоа да се докаже на суд. - Многу е полесно кога некој се заканува. Тогаш постои доказ и заканувачот лесно може да се изведе пред суд. Кога станува збор за заговор, тешко се доаѓа до докази - вели за „Време“ висок функционер во македонските безбедносни служби... 

Некои од соседите на Груевски потврдуваат дека двапати во текот на минатата година безбедноста околу премиерот била драстично зголемена. Припадници на МВР ги испрашувале луѓето, ги проверувале нивните станови. Тие сведочат дека забележале повеќе униформирани полицајци и специјалци околу зградата и внатре во неа. Влегувањето во влезот било дозволено само за станарите... гостите биле прво проверувани од полицијата. Откако му се пожалиле на Груевски и било утврдено дека веќе не постои закана, обезбедувањето било вратено на нормала.

...Случајот со Груевски не е прв... Слични закани и дојави имало за речиси сите досегашни премиери.