Нострадамус го предвидел Гангнам стајл! (Уште да го видевме да заигра)

Страшна, односно страшно смешна приказна го окупира Интернетот деновиве, во која главни ликови се пророштвата на Нострадамус, пророштвата на Маите и, верувале или не, ултрапопуларниот Гангнам-стајл.

Според неа, Нострадамус на времето предвидел дека танцувачкото лудило наречено Гангнам стајл ќе го навести крајот на светот (кој исто така е „предвиден“ и од Маите) и дека тој е тука, зад аголот.

Цитатот што му се припишува на легендарниот аптекар по професија и јасновидец по репутација вели:

„Од мирното утро крајот ќе дојде

Кога на танцувачкиот коњ

Бројот на круговите ќе биде 9“.

Ова апокалиптично хаику кружи по светската мрежа, тврдејќи дека Нострадамус предвидел дека крајот на светот ќе го најават 1. мирно утро, 2. танцувачки коњ и 3. девет нули.

Во една прилично широка и амбициозна интерпретација, сето ова се поврзува со јужнокорејскиот феномен Пси и неговиот глобален хит Гангнам стајл. Нештата стануваат интересни доколку сакате да поверувате дека цитатот е навистина на Нострадамус (што не е докажано) и доколку сте подготвени да ги прифатите „доказите“ што ги нуди интернет-академијата на науки и светски катастрофи. (Нам лично ни е пореално дека на самиот Пси му здодеало да биде само културолошки апокалиптичен, па почнал да си пушта вакви приказни за да си додаде на тежина и со малку физичка апокалиптичност).

Еве ги линковите на приврзаниците на оваа теорија:

Кореја е позната како „земја на мирното утро“. Во 1934 година пред нашата ера, император од кинеската династија Минг на Кореа ѝ ја доделил титулата Шаохзиен, што значи утринска свежина, поради прекрасната природна убавина на живописните планини и бистри води и нивниот совршен мир, особено наутро. А Пси е од Кореја! Значи, со тоа е покриено „мирното утро“.

„Танцувачкиот коњ“ може да биде јавачкиот стил на танцување на Гагнам стајл.

Последниот стих, „бројот на круговите ќе биде девет“, според судноденците, се однесува на бројот на кликовите на Јутјуб кога ќе стигне до 1 милијарда отворања. Во моментов спотот има преку 844 милиони кликови на популарниот сајт за видеа.

Многумина, со желба целата работа да биде што покатаклизмична, го поврзуваат „пророштвото“ со митот за календарот на Маите и крајот на светот закажан за 21 декември 2012.

Во исчекување на една од „најавените“ апокалипси, погледнете го видеото Гангнам-стајл на Пси. За што побрзо да стигне до бројката со деветте нули и да ни олесни што сме уште тука, живи и здрави.

Или, ако верувате во теоријата, барем да заминеме танцувајќи.