Седум повредени, неколку оштетени автомобили и кривични пријави за осум лица, е епилогот по вчерашниот инцидент во скопската населба Нерези меѓу навивачите на фудбалскиот клуб „Вардар“ и локалното население.

- МВР продолжува со расчистување на случајот и откривање на други учесници кои би биле осомничени, обвинети за сторен пркршок и за нарушување на јавниот ред и мир, изјави денеска министерката за внатрешни работи Гордана Јанкулоска, додавајќи дека насилството во спортот нема да се толерира без разлика од кого доаѓа и секое насилство најостро ќе биде санкционирано.

Таа информира дека по обезбедените докази врз основа на препознавање, извршената анализа на местото на настанот и од извршени разговори со очевидци, но и со учесниците на настанот, осум лица се веќе пред истражен судија.

Анализирајќи го случајот, Јанкулоска истакна дека инцидентот се случил пред почетокот на фудбалскиот натпревар меѓу „Вардар“ и „Македонија Ѓорче Петров“ кога група навивачи т.н. „Комити“ движејќи се кон стадионот почанале вербални расправии со локалното население од Нерези, меѓусебни префрлања, довикувања и навредувања што потоа резултирале со физичка пресметка. Локалното население, според министерката, претрпело одредени штети, седум лица се полесно повредени, оштетени се исто толку автомобили, а кај поголем дел од очевидците предизвикана е состојба на страв и несигурност.

- По настанот, полицијата реагираше на превенција на ескалација на инцидентите, но и по завршувањето на натпреварот за безбедно оддалечување на навивачката група „Комити“ од стадионот до местото на живеење за да се избегне инцидент со локалното население, изјави министерката за внатрешни работи.

Таа посочи дека доколку проценат дека некој од полициските службеници кои биле распоредени на извршување на задачи во местото на случување на инцидентот, не реагирале соодветно против нив ќе бидат преземени соодветни мерки.

Прашана дали навивачката група „Комити“ пријавила во полиција дека пешки ќе оди до стадионот, Јанкулоска рече дека тие не пријавиле во МВР, но и оти немаат таква обврска.

- Степенот на ризик на еден спортски натпревар е должен да го процени организаторот и доколку е ризичен да побара вклучување на МВР во неговотот обезбедување во различни фази, додаде министерката за внатрешни работи.

За барањето на ДУИ и на градоначалникот на општина Карпош за разрешување началникот на локалната полициска станица, Јанкулоска рече дека не ги слушнала тие изјави и не може да ги коментира.

- Ние во секој настан ја проценуваме и инволвираноста и постапувањето на полициските службеници во одредена ситуација. Веќе имаме службени белешки од сите полициски службеници. Ќе се направи проценка дали можело да се направи нешто за превенција, најави министерката Гордана Јанкулоска