Како ќе се пресметува БРУТО ПЛАТА?

Сите вработени до Нова година треба да потпишат нов договор за работа со посочен износ на бруто-плата, во која се вклучени социјалните придонеси, персоналниот данок и сегашните трошоци за храна и превоз. Сепак, вработените нема да носат дома повеќе пари отколку претходно бидејќи ќе им се исплаќа само нето-платата.Примената на системот на бруто-плати ќе почне со јануарската плата.

- Дел од работодавците имаат обичај во договорите на неопределено време да не ја посочуваат платата на работникот, бидејќи таа се менува со тек на време. Во следните три години стапката на придонеси ќе се намалува. Ако износот на платата е посочен во договорот, тоа значи дека како што ќе се намалуваат придонесите, парите што работникот ќе го носи дома ќе се зголемуваат. Ако работодавецот сака да ја смени сумата во договорт, тоа ќе се прави со анекс. Таа варијанта е предвидена и за договорите на определено време.
Бидејќи платата „на хартија“ ќе биде повисока, вработените ќе треба да плаќаат и поголем данок. Поради тоа e зголемено личното ослободување на вработените. Наместо 3.200 денари како досега, ослободувањето ќе изнесува 7.000 денари, а даночната стапка ќе остане иста.Бруто-платите ќе се пресметуваат електронски, за што постои посебен софтвер кој може да се преземе од интернет-страницата на УЈП. Пресметките се внесуваат во електронски образец, кој се испраќа до Управата, по што се проверуваат. Ако евентуално има грешка, образецот се враќа до испраќачот, кој има рок од три дена за да ја коригира. Откако УЈП ќе утврди дека пресметките се во ред, работодавецот добива налог дека може да ги уплати парите за плати и за придонеси. Со уплаќање на вкупната сума во банка, работодавецот истовремено ги префрла парите за плати, за придонесите и за персоналниот данок за вработените.

Работодавецот не може да ги исплати платите ако не ги уплатил придонесите за вработените. Системот е така направен што дозволува можност парите за плати и придонеси да се уплаќаат на неколку рати, но мора да биде испочитуван крајниот рок - до 15-ти следниот месец. Ова не може да се злоупотреби бидејќи софтверот ќе евидентира ако работодавецот не си ја исполнил обврската, по што УЈП веднаш ќе испрати инспекција.

Работниците што не го пријавиле газдата во УЈП дека не им уплатил придонеси ќе мора да платат казна од 500 до 1.000 евра. Толкава е и казната ако не пријават дека работодавецот не им дал писмена пресметка на платите. Казните за работодавците што не ги уплатиле придонесите во законскиот рок се движат од 2.000 до 3.000 евра.

Ако само еден вработен од фирма пријави неправилности, УЈП ќе ги казни другите работници зашто не си ја исполниле обврската. Од Министерството за финансии ги охрабруваат граѓаните да ги пријавуваат газдите. Оттаму велат дека вработените што сакаат да пријават не треба да стравуваат за работните места зашто податоците ќе им бидат заштитени.