ВРАБОТУВАЊА

Слободната економска зона Бунарџик кај Скопје остана речиси празна, и покрај најавите од Владата дека во неа повеќе нема да има место за градење. Министерот за странски инвестиции Веле Самак признава дека четири странски компании, кои годинава планирале да градат свои фабрики во зоната, целосно ги откажале своите инвестиции во Македонија. Тој не ги открива нивните имиња, но објаснува дека се работело за реномирани западноевропски производители. На две од нив Македонија, според Самак, им била топ 2 дестинација за инвестирање, но поради рецесијата, одлучиле да не го прошируваат бизнисот во ниту една земја, па ниту во Македонија. Другите две компании, од која едната е "Грудхост" од Данска, иако ги разгледувале условите за инвестирање во Македонија, одлучиле бизнисот да го шират во други земји. Како поповолни за вложување ги одбрале Србија и Турција, вели министерот за странски инвестиции Веле Самак.
Пред точно половина година, на свеченоста за поставување камен темелник за нова трафостаница во Бунарџик, министерот Самак изјави дека за шест месеци во зоната веќе нема да има место за нови инвеститори. Тогаш тој рече дека до пред две години Бунарџик потсетувала на "скршени соништа, на ливадата на заборавени ветувања", а сега е големо градилиште.
Денес, по половина година од изјавата на Самак, во Бунарџик се е по старо. Единствено целосно изградена е фабриката на "Џонсон контролс", а во изградба е само објектот на "Џонсон Мети".
Самак вели дека останатите тројца инвеститори кои беа најавени пред половина година не си заминале, туку накратко ја одложиле изградбата на фабриките.
"Во Бунарџик остануваат француски 'Монтипе', словенечка 'Искра' и италијанскиот производител 'Група Орланди'. Овие инвеститори не се откажуваат, само го продолжуваат рокот за влегување во Македонија. 'Монтипе', според најавите, со инвестицијата ќе доцни околу два месеца. Слична најава има и од останатите два инвеститори", вели Самак.
Според министерот, за овој неуспех на долгонајавуваниот инвестициски бум во Македонија е виновна Волстрит.
"Се случи ретка и драстична промена во светската економија. По падот на Волстрит, не постои никаква можност за финансирање на проекти. Многу компании се повлекуваат од нови инвестирања, некои одлучуваат да ги одложат проектите на некое време. Посебно Европа е многу осетлива бидејќи се уште нема стимулативни мерки за инвеститорите", тврди Самак. (И.С.)