Критики позитивни/негативни на личните тв

Кон небото гледам
каде не припаѓам
ѕвезди си намигнуваат
како споменик сум
нем и тивок
со букви нечитливи
исполнети со наслаги од време
никој нема да пронајде
каде закопано беше
не е дел од овој свет
никогаш и не беше
ниту беше за мене
само се најдов на патот
на она што беше
од патот кон ѕвездите скршнато.
Ветер шепот ми носи
дека сум само земјен створ
и некоја прашинка
кон око која ми се стреми
а тврдоглав сум
очите не ги затворам.

Не престанувам
иако раката млитаво ми виси
гледам во една точка
не престанувам
но ништо не е
само чекам уморот
од мене да се измори
за оној што бев
повторно да се ослободи
иако ми вели дека залудно би било
како пајакот во кошот
пајажина кој плете
за наутро исчистен да биде
може знае, може и не,
дека наместо да лови
уловен ќе биде
но сепак не престанува,
иако ме прашува
дали знам каде се наоѓам
пред да помислам нешто да побарам.
Само за тебе молчи
не се противи
само подзамижува
заради светлината која ја имаш
во мојата свест
единствена причина
да се исправам и станам
зачекорам
знаејќи што барам.

на Blueprayer

Оваа песна не е за мене
нити за него - туку за неа,
која е мазна и лизгава
како бела јагула;
која со насмевка на делфин
ги поздравува намуртените ајкули;
со седефната кожа
свети во темните води
и ги задева коралите
со разиграните прамени
ко дар од Ботичели.
Не се роди од школка,
но знае да отвора школки
со тајната молитва
што и ја шепнаа сирените.
Таа е ловец на бисери,
осамен талкач по сини гребени
и неустрашив трагач
по морски чудовишта.
Нејзините лузни
се нејзините трофеи
и можат да се видат само
низ леќата на нејзиното око.

Размачкано (оригинално "рашмрљано")

Откога Бог почна
да се чува од човекот,
наместо човекот
од Него,
здолништата станаа
поотворени од очите,
а нозете пораширени
од рацете.
Се' е некако премногу,
а ништо не е доволно.
Срцата ни станаа размачкани точки
што им глумат љубов на дамарите,
а душите ги препарираме со слама
и ги ставаме наместо плашила
пред телата што и онака никој
вистински не ни ги посетува...

Езерска површина за една стапка,
приватно небо за капка дожд,
парче хоризонт за еден зрак зајдисонце...
Премногу ли барам?