Љубомир Савевски поднесе оставка од селекторската функција на македонската ракометна репрезентација. Савевски вели дека ваквиот потег го повлекува во интерес на репрезентацијата и обвини неколку медиуми за непринципиелна кампања за негово заминување. На последниот тренинг не се појавија 6 ракометари на Металург. Ракометарите кои ја одбија поканата на Савевски рекоа дека ги навредувал на последниот натпревар во Автокоманда, каде тој ја предводеше екипата на Вардар Про.

„Оставката ја дадов во интерес на репрезентацијата. Против мене се води организирана кампања. Во медиумите се појавија измислици дека јас сум ги избркал играчите од првиот тренинг на репрезентацијата. Ги отфрлам овие неточни обвинувања, но заради смирување на тензиите кои настанаа во репрезентацијата пред квалификациите за ЕП 2012 одлучив дека е најдобро да се повлечам од селекторското место“.

Регионална суперлига во ракомет е на повидок. Во неа би играле најсилните клубови од Македонија, Хрватска, Словенија, Србија, БиХ, Црна Гора, па дури и од Австрија, Унгарија и Швајцарија.

„Потпишан е акт за основање на лигата, а деталите дополнително ќе се знаат. За проектот преговараат заинтересираните страни и сите се согласија дека тоа ни е од заеднички интерес. Не е дефинирано уште која земја колку претставници ќе даде, веројатно по два, а Австрија и Црна Гора по еден. Од БиХ на почетокот би имало три, и тоа заради развој на ракометот во сите три национални ентитети. После се` ќе се регулира со квалитетот на националните претставници“, изјави алфа и омегата на хрватскиот ракомет Зоран Гобац за Јутарњи.

Проектот има поддршка од сите страни, а ќе се основа и нова организација СЕХА (South Europe Handball Association) со претставници од сите земји учеснички. Натпреварувањето би почнало во сезоната 2011/12.

„Имаме поддршка од ЕХФ и ИХФ и се планира клубовите кои ќе играат во лигата да изборуваат пласман за дополнителни места во Лигата на шампионите и другите европски купови. Тоа ќе биде дополнителен поттик за ракометот во цел регион. Нашите млади играчи ќе имаат многу повеќе добри натпревари, а ќе профитираат и репрезентациите“, заклучи Гобац.

И македонскиот ракомет ќе има огромна корист од вакво натпреварување, особено бидејќи веќе подолго време само Вардар и Металург се борат за титулата и освен дерби мечевите немаат други силни натпревари.

Најверојатно токму овие два клуба би биле дел од регионалната супер лига, која би имала најмногу 16 клубови, а главен спонзор би бил Ерсте груп, чие име ќе биде во назив на лигата.