Признавам.......

Титов Врв - предизвик за планинарите

Зоран Јованоски

Титов Врв е висок 2.747 метри

2.747 метри високиот врв на Шар Планина - Титов Врв, викендов повторно ќе биде предизвик за планинарите од планинарскиот клуб „Љуботен“.

Овој пат традиционално, по 28-ми пат, над 400 планинари од Македонија, Балканот и повеќе европски земји, ќе ги видат и почувствуваат убавините до највисокиот врв на Шара.

„Од сите возрасти, по секакви временски услови, на денот на организирањето - последниот викенд на мај, доаѓаат во Тетово, се искачуваат на Попова Шапка и сите заедно се искачуваме на Титов Врв“, изјави Јован Божиновски, претседател на планинарски клуб „Љуботен“.

Вечерва е големата планинарска забава на Попова Шапка, а утре изутрина се тргнува кон врвот. Искачувањето ќе се одвива по Вакувска патека која е веќе обележана.

Ќе биде следено од планинарски водичи, Горско-спасителната служба и медицински тим. Организаторите препорачуваат соодветна планинарска опрема и секој од учесниците да биде во добра психофизичка кондиција.

„Да се има добри планинарски чевли или посолидни патики, потоа ракавици и капа и планинарска јакна, ветровка, затоа што знаеме дека временските услови се променливи на планина“, рече Клементина Трпчевска, канцеларија за водење на Шар Планина.

Титов Врв е најпосетуваното место на шарските падини. Првото организирано искачување било во 1980 година.

Оттогаш станува традиционално и досега околу 15.000 планинари се воодушевувале од панорамите, стрмните камени предели и долгите глечери на шарпланинскиот масив.