Наместо во музеј, воените оклопни транспортери фрлени на буниште! (ФОТО)

Полициски транспортери од типот ТАБ-71 од романско производство набавени од поранешната ЈНА, а подоцна оставени во наследство на македонското МВР и советски извидувачки возила БРДМ-2 се оставени да скапуваат крај патот близу воениот отпад во Скопје.

Оваа неодговорна постапка на Министерството за одбрана, на МВР, а најмногу во случајов на директорот на воениот музеј, го поттикнала тетовецот Владимир Трпковски да покрене иницијатива за зачувување на воените возила, па испратил и писмен предлог до Министерството за одбрана пред околу еден месец. Предлогот е транспортерите да се сместат во кругот на Воениот музеј во Скопје. Одговор сѐ уште нема, но Трпковски не се откажува:

„Станува збор за експонати што имаат големо значење во нашата историја од осамостојувањето, па сѐ до нивното повлекување од активна употреба. Во време кога секојдневно ја градиме нашата држава дел по дел и кога и најмалото камче е значајно во мозаикот од факти и докази, срамно и жално е полициски транспортер од типот ТАБ-71 од романско производство (копија на Советскиот БТР-60), набавен од поранешната ЈНА, да стои крај патот на воениот отпад. Овој транспортер поранешната ЈНА му го отстапила на тогашното МВР. На овие простори е пристигнат непосредно пред нашето осамостојување во 1991 година. Советските извидувачки возила БРДМ-2, кои беа набавени директно од страна на МВР, беа користени за време на гостиварските настани, а потоа и за време на конфликтот во 2001 година. Да ги немавме тогаш, јас не знам како ќе го сочувавме Тетово“, вели Трпковски, кој за време за војната учествувал во резервниот состав во одбрана на земјата и на родниот град.

За него е несфатливо како досега никој ниту во МО, ниту во Воениот музеј не се заинтересирал да им најде соодветно место на овие воени возила и да ги сочува сведоштвата за нив:
„Како единствени оклопни возила во МВР служеа десетина години, а во конфликтот во 2001 година имаа значајна улога во почетокот, бидејќи беа единствени вооружени оклопни возила во составот на МВР. Меѓутоа со текот на годините, со истекот на ресурсите и набавката на посовремени возила, доаѓа крајот на кариерата на ТАБ-овите и на БРДМ-2. Она што иритира е фактот што никој не нашол одговорност за испраќањето на овие транспортери во отпад. Денес транспортерите се наоѓаат во близина на воениот отпад во Скопје оставени крај патот. Дел се канибализирани со бренер, дел ги чека иста судбина“, смета Трпковски и се надева дека МО сепак ќе го прифати овој предлог и ќе спаси барем по еден оклопен транспортер и БРДМ-2 со тоа што ќе се постројат во збирката на возила што сега се наоѓа во дворот на Воената академија во Скопје.

„ Би требало да се изложат во новиот Воен музеј на Скопско кале како видлив и автентичен доказ за скромните почетоци на безбедносните сили во Република Македонија. Моево мислење го делат десетици пријатели ентузијасти, кои сметаат дека материјалните докази не треба сами да си ги уништуваме, бидејќи од сите поранешни југословенски републики што го имаа транспортерот ТАБ-71 во своите редови, ниеден не е сочуван, додека во некои армии БРДМ-2 сѐ уште се користи“, вели Трпковски.

Фотографиите ги снимиле членови на форумот avijacija.mk

Нови сеуште нема, а старите какви такви можеа ремонт да доживеат.. утре недај боже ќе кукаме ако не спофати некој зорт па ќе бараат некои кршови по другиве земји..