СРЦЕ ЗА ЖИВОТНИТЕ - здружение

Е ова за циркусот не ми се допаѓа...
Пинокио ли ќе го гледаме на циркуз, добро е да видиме и некое диво, а питомо животно кое го има во поголем број. Не сега некој ретки ама некој што ги има во вишок и треба, само да не им даваат задачи да прерипаат обрачи со оган и слични екстремни работи.

“Вдоми-не купувај”



плоштад Македонија на 4. октомври 2009 год. во недела, од 10:00 до 21:00

Во недела на 4. октомври - Светскиот ден за заштита на животните, ќе се одржи голема акција за вдомување бездомни кучиња на плоштадот „Македонија“ во Скопје, под мотото “Вдоми-не купувај”. Срдечно Ве покануваме да се вклучите во истата (за дополнителни информации, слободно контактирајте не)

Акцијата ја организира Здружението за заштита на животните и животната средина „Срце за животните“, заедно со самостојните активисти за заштита на животните, а стационарот Вардариште се согласи да ги отстапи бездомните мали кутриња кои биле заловени по улиците на Скопје и истите ќе бидат изложени на акцијата и понудени за вдомување.

На плоштадот Македонија ќе има стотина мали кутриња кои ќе ги чекаат хуманите луѓе да им пружат дом и грижа каква што заслужиле. Сите изложени кученца ќе бидат вакцинирани и прочистени, а оние граѓани кои ќе се одлучат да вдомат кученце, ќе добијат храна и подароци за него. Се надеваме дека голем број граѓани ќе се одлучат да спасат некое од бездомните кутриња и со тоа да спасат живот, а за возврат ќе добијат доживотен пријател.



Изменето од Majkl - 03.Октомври.2009 во 19:34

КОНЦЕРТ НА Bernays Propaganda на 7-ми септември 2009(понеделник), во МКЦ -
ПОДДРШКА ЗА „СРЦЕ ЗА ЖИВОТНИТЕ“ И ПОВИК ДА ЗАПРЕ МАСАКРОТ ВО СТАЦИОНАРОТ ВАРДАРИШТЕ!


Ве известуваме дека во понеделник 07–ми септември со почеток од 21:00 во Младинскиот културен центар(кај МТВ) ќе се оддржи самостоен концерт на БЕРНАЈС ПРОПАГАНДА кој ќе биде воедно реакција и повик за запирање на масакрот на бездомните кучиња во стационарот Вардариште.

Овој бенд, познат кај нас и во светот целосно не подржува во заложбите за хумано решавање на проблемот со прекумерната бројност на кучињата скитници и жестоко реагираат на енормно високата стапка на евтаназија во стационарот (официјални 60% - стапка највисока во Европа!), на тамошниот нехуманиот третман на кучињата, на забраната за влез на заинтересирани граѓани за посвојување секој ден (отворено е по 3 часа само 2 дена неделно), за разлика од праксата во сите европски стационари и приемни термини, а и на забраната за сликање - што во секој нормален стационар се препорачува како би се пропагирало вдомувањето. Реагираат на инертноста на одговорните лица да се реши проблемот на единствениот прифатлив, ефикасен и хуман начин за Европа а тоа е МАСОВНАТА СТЕРИЛИЗАЦИЈА, А НЕ МАСОВНАТА ЕВТАНАЗИЈА! Воедно апелираат до сите граѓани да вдомат куче, спасат живот и добијат бесплатен пријател.

Активистите од СРЦЕ ЗА ЖИВОТНИТЕ за време на концертот ќе имаат штанд со информативен материјал.

За контакт и дополнителни информации:

„СРЦЕ ЗА ЖИВОТНИТЕ“
СРЦЕ ЗА ЖИВОТНИТЕ
п.фах 420, 1000 Скопје
mob. ++ 389 75 800-765

e-mail: info@srcezazivotnite.org.mk
http://www.srcezazivotnite.org.mk


Изменето од Majkl - 04.Септември.2009 во 16:54

Реакција на писмото во Утрински весник, објавен четвртокот,
9.јули 2009, под наслов „Кутриња без дечиња“

Почитувани,

Згрозени од написот во Вашиот весник (Утрински весник) четвртокот, 9.јули 2009, под наслов „Кутриња без дечиња“, како објавено писмо од г-н Петре Кривчевски, најпрвин не зачуди како одлучивте да објавите толку вулгарно писмо кое зрачи со омраза. Впрочем, секоја критика или став може да се искаже на еден достоинствен и културен начин.

Би сакал да одговорам и дадам коментар на прашањата поставени во писмото од г-н Кривчевски за целата јавност:

Огромниот број на кучиња во градовите во Р.Македонија е директна последица од односот на луѓето. Исто како и негрижата за бездомните ромчиња и земјоделците, фармерите, стечајците... Асоцијацијата на здруженијата за заштита на животните никогаш не ставиле никого „пред“ или „позади“. А за проблемите во нашето општество најмалку се криви бездомните животни.

Од друга страна, според законите и ингеренциите за бездомните животни во Р.Македонија, тоа е ингеренција и обврска на градовите, т.е. локалната власт. Од 1.1.2008 год во Р.Македонија стапи во сила новиот Закон за благосостојба на животните, а нашата држава е и потписничка на некои меѓународни конвенции за правата на животните, што повлекува и обврски за хуман однос (исто како што е казниво според закон и малтретирање и насилство врз луѓе). Активистите на здруженијата веќе имаат вдомено бездомни животни, од свои сопствени средства и помош од локалните ветеринари помагаат за стерилизација и третман на бездомните животни, но без добра волја и помош од институциите на кои тоа им е работа, тешко дека проблемот би можел да се реши.

Факт е дека голем дел од милениците купени од граѓани, завршуваат на улица и стануваат дел од проблемот. Се додека државата со закон не го реши (обврзи сопствениците) обележувањето/чипирањето на домашните миленици, со што точно во секој миг ќе се знае здравствената состојба и сопственикот, тоа ќе биде еден од најголемите проблеми за зголемување на поулацијата на бездомни животни.

За темата „Опасни и агресивни животни“: Никој од нас не сака непријатни глетки по улиците, болни, шугави и прегладнети животни, исто како и бездомни луѓе. Никој од нас не сака да биде нападнат од глутница кучиња и искасан (иако мене лично не ми се случило). Се разбира, тие кучиња не би требало да се вратат на улица, но би требало да има и точно одредени критериуми за тестирање на агресивноста, како би се одлучило дали би биле евтаназирани, или би се вдомиле. Зашто, во голем дел случаи, тоа се животни кои се „шутирани“ и малтретирани од несовесни луѓе. И човек, како човек, после константно малтретирање, доаѓа момент кога реагира на еден таков нехуман третман. Впрочем, дали сите незадоволни стечајци и измамени граѓани кои излегуваат на отворени протести барајќи ги своите права треба да се стават зад решетки, или можеби прогласат за агресивни и неурачунливи заради ситуацијата во која се наоѓаат? Сите имаат право на живот и треба да имаат одредени права во општеството. Господ на сите ни дал здив, и на луѓето и на животните. А ние луѓето на ниедно живо суштество не сме му дале здив (ниту на животните). Човекот, единствено што успеал е да манипулира со животот. Според тоа, никој од нас нема ни морално право да одземе живот. Исклучок кај животните би биле само неизлечиво болните и навистина агресивните, кои безболно и хумано би биле евтаназирани.

Никој од нас не сака да се споредува со земји од третиот свет, каде ни животни ни луѓе немаат никакви права. Сакаме да бидеме цивилизирана држава, да нема немаштија и на сите да им е добро – ама за тоа треба и ние самите да се менуваме, секој поединец. А, за тоа Махатма Ганди, добитникот на нобелова награда за мир и поборник за човековите права изјавил: “Величината и моралниот напредок на една нација можеме да ги цениме според начинот на кој таа се однесува кон животните.“. Значи, не според парите, туку според нашиот изграден однос.

Со оваа девиза ние апелиравме и апелираме до граѓаните кои имаат можност, услови и, пред се, љубов, да вдомат бедомно животно.

Со почит:

„СРЦЕ ЗА ЖИВОТНИТЕ“

п.фах 420, 1000 Скопје
моб. ++ 389 (0)75 800-765
e-mail: info@srcezazivotnite.org.mk
Е-маил адресата e заштитена од спам ботови.
www.srcezazivotnite.org.mk

Изменето од Majkl - 11.Јули.2009 во 18:06

СОПРЕТЕ ГО МАСАКРОТ ВО СКОПЈЕ!
ПЕТИЦИЈА ЗА СПАС НА БЕЗДОМНИТЕ КУЧИЊА

По писмата упатени до градоначалникот на град Скопје, г-н Коце Трајановски и премиерот, г-н Никола Груевски, со молба итно да се заложат за прекин на крвавиот масакр во нашиот град (практикување на убивање на повеќе од секое второ куче, т.е. алармантни 55,7% од заловените животни) и да се наложи нова програма и концепт, од денес е покрената меѓународна петиција со апел до градоначалникот да се сопре со овој масакр.

ЛИНК ДО ПЕТИЦИЈАТА

Заради добробит на овие невини беспомошни суштества, Ве молиме и вас, секого поединечно, да се вклучи ви оваа петиција.


Ви благодариме.

За контакт и дополнителни информации, Ви стоиме на располагање!

„СРЦЕ ЗА ЖИВОТНИТЕ“

п.фах 420, 1000 Скопје
моб. ++ 389 (0)75 800-765
e-mail: info@srcezazivotnite.org.mk Е-маил адресата e заштитена од спам ботови.
www.srcezazivotnite.org.mk

Изменето од Majkl - 05.Јули.2009 во 08:17

Деновиве здружението упати уште едно писмо до премиерот на Република Македонија. Во него се вели:

ПРЕДМЕТ: Итно обраќање за справување со неконтролираната бројност на бездомните кучиња во град Скопје (посочување и на преголеми неправилности во спроведувањето на концептот на стационарот Вардариште како хумана и ефикасна алтернатива за справување со неконтролираната бројност на бездомните кучиња во град Скопје, каде стапката на усмртување е дури 55,8%). Предлози и укажувања за ефикасно решавање и справување со овој долгогодишен проблем.



Почитуван Премиерe Груевски,

длабоко сме загрижени за состојбата на бездомните животни во град Скопје и воопшто во Македонија. Заради тоа, Ви се обраќаме со конкретни предлози за стратегијата за хумано, цивилизирано и успешно соочување и решавање на проблемот со неконтролираната бројност на бездомните кучиња во град Скопје, согласно со Законот за благосостојба на животните и другите закони на Република Македонија и Ваши овластувања како градоначалник, а во склад со директивите, одлуките и одредбите на Европската Унија.

Сметаме дека единствено Владата и Вие, како Премиер, можете да помогнете ситуацијата да се промени, со оглед на тоа што најчесто промените се условени соработката меѓу институциите и повеќе ресорни Министерства во државата. Длабоко сме убедени дека со тие мерки, ефикасно и со заеднички напори, во догледно време би успеале да се воспостави контрола и решавање на овој проблем, применувајќи најсовремени европски и светски модуси.

Иако во град Скопје од 2007 година постои еден транзитен центар (стационарот Вардариште), тој со своите капацитети НЕМА никаква моќ да се справи со бројката на бездомни кучиња во целиот град! Смешно е да се очекуваат сериозни резултати кога таму има само 1 служба за заловување и 1 ангажиран ветеринар (потенцираме дека апсолутно сме убедени во компетентноста и моралноста на истото лице, и дека зборуваме поточно за фактичката неизводливост

еден човек и покрај сопственото максимално вложување и расположивост САМ да се справи со толкава бројка!). Од официјалните податоци за “третирани” кучиња испаѓа дека (Официјална статистика од 9.2007 до 1.2009 год.) 1976 кучиња се заловени, од кои 1105 се еутаназирани, 711 се третирани , 130 се посвоени - од вкупната бројка, значи, се усмртиле 55,8 %. Испаѓа дека таму се третирале дневно (работни денови) едвај 4,9 кучиња - од кои 2,76 кучиња се усмртени – знач,и во најдобар случај, им било инјектирано средство за усмртување - ПОРАДИ ОВА ТВРДИМЕ ДЕКА ИНСТИТУЦИЈА КОЈА ТРЕБА ДА СЕ СПРАВИ СО БРОЈКАТА ОД РЕЧИСИ 10.000 БЕЗДОМНИ КУЧИЊА НЕ СМЕЕ ДА СИ ДОЗВОЛИ ТАКВО ТЕМПО, НЕЕФИКАСНОСТ И ОСКУДНИ КАПАЦИТЕТИ и САМО ЕДНО КОМПЕТЕНТНО ВЕТЕРИНАРНО ЛИЦЕ! Доколку се погледне само законот за ветеринарно здравство (член 43) за да постои една амбуланта, клиника и слично, НЕОПХОДНО е работење во смени што би вклучило најмалку уште еден ветеринар, а знаеме дека во една амбуланта се потребни капацитети далеку помали од капацитет во установа која има за цел третирање на огромна бројка на бездомни кучиња и да реши градски проблем! Очекување на позитивни резултати со вакво темпо е сосема илу-зорно, а во меѓувреме се губат и неповратно трошат огромни суми на пари!

Сметаме дека никако не треба да се занемари и фактот што освен ветеринарното лице ангажирано во стационарот, ниту едно друго лице не е компетентно за пропагирање и посочување на вдомувањето бездомен миленик како солуција (ова за жал ни го имаат потврдено огромен број на граѓани, а и ние повеќе пати имаме увидено дека ангажираните лица од ЈП “Комунална хигиена“ и самите не веруваат дека бездомните кучиња треба да се вдомуваат!) а доколку сакаме да ги следиме методите во модерниот свет вистинскиот пристапот и инволвирањето на лица од НВО и волонтери - љубители на животни биле значаен фактор практика на вдомување да оди во евидентна нагорна линија!

Заради тоа ние ИНСИСТИРАМЕ дека само со реорганизација и итно зголемување на капацитетите (просторно), и пред се, со ангажирање на најмалку уште 5 стручни ветеринарни лица, во услови кога би се практикувало третирање на најмалку 20 кучиња дневно, во рок од една година би се истретирале, т.е. стерилизирале и кастрирале 7500 улични кучиња (при тоа потенцираме: зборуваме за хипотетички услови, кога би немало ниту една потреба од еутаназирање! На тој начин би можеле да гарантираме максимално ефективно, хумано и исплатливо инвестирање во оваа проблематика, со која потоа ке се воспостави ТРАЈНА контрола на кучињата и сигурно намалување на нивната популација! Потенцираме, ние стоиме во секој момент на располагање да побараме дополнителна финансиска помош од фондации кои се грижат за правата на животните, да поканиме стручни лица од странство и стоиме како организација на располагање за секаква поинаква помош за која би биле компетентни!



Во прилог на ова, неопходно и итно е:

1.   Итен прекин на масовната еуатаназија/убивање на кучињата. Според официјалните податоци за работата на стационарот, 55,8% од сите заловени кучиња се еутаназирани.Тоа во никој случај не може да се оправда, ниту од етичка гледна точка, ниту во однос на Законот за благосостојба на животните. Почитуван Премиеру ние како здружение и јавноста длабоко сме убедени дека е невозможно повеќе од секое второ куче во нашиот град да е болно или прекумерно агресивно и со тоа дека е оправдана таквата стапка на усмртување! Со таквата геноцидна пракса мора веднаш да се престане, и тоа не само од етички причини, туку и заради тоа што тоа е спротивно со законот и веќе се покажала како неефикасна во минатото. За таквата состојба да се промени, потребна е помош од Министерството за земјоделство, шумарство и водостопанство и Ветеринарната управа;

2.   Вклучување на повеќе ветеринарни и стручни лица за извршување на интервенциите и заловување на кучињата, а воедно и лица кои би се залагале за поефикасна стапка на вдомување – во спротивно е илузорно и сосема необјективно да се сметаат и очекуваат некои видливи резултати со она што тој како алтернатива го нуди (една служба со едно возило и еден ветеринар). Конкретно, предлагаме секоја општина да ангажира ветеринар и заловувачка служба со возило. На тој начин, програмата за стерилизација многукратно ќе ја зголеми својата ефикасност, и за многу пократко време ќе се намали нивната популација. На долгорочен план заштедите би биле значителни и евидентни, бидејќи системски би се надминал проблемот! Владата би можела финансиски да ги помогне општините и Зелс за оваа програма да може да се реализира.

3.   Помош во организирање на кампањите за подигнување на јавната свест на граѓаните (видео спотови, билборди, постери, флаери и др.) Исклучително би ја акцентирале важноста за учество на Владата во овие кампањи, заради искоренување на лошите навики кои се спротивни на Законите на Р.Македонија (масовни труења животни ...). Акцентираме дека е неспроводливо тие обврски да се препуштат само на волонтерски здруженија и на граѓаните. Наш предлог: ТВ КАМПАЊИ ЗА ПОХУМАН ОДНОС КОН ЖИВОТНИТЕ која ќе оди по ТВ медиумите со цел да се влијае на свеста на луѓето да ги сакаат и почитуваат животните и да им помагаат, а оние од другата страна (нехуманите) да сфатат дека постојат казни за нехуманото однесување кон животните (МАЛТРЕТИРАЊЕ, УБИВАЊЕ). Исклучително важно е Вие, како претседател на Владата на Р.Македонија јавно да се заложите за откривање и санкционирање на сторителите на такви дела, кои ги ставаат во опасност луѓето, посебно децата (вообичаена е праксата на користење отрови кои и кај луѓето за многу кратко време би довеле до фатален, смртен исход – потсетуваме, ДОСЕГА НЕМА НИТУ ОТКРИЕН, НИТУ САНКЦИОНИРАН СТОРИТЕЛ НА ТАКВО КРИВИЧНО ДЕЛО. Се наметнува прашањето: ЗОШТО?).                                   h          

4.   Градот Скопје е единствена метропола во Европа без ниедно прифатилиште за животни. Отворање прифатилишта за бездомни животни водени од граѓанските здруженија од оваа област е потреба на сите градови во Р.Македонија, а посебно во Скопје и Битола. За ваков проект, неопходна е помош од Владата со буџетски средства на годишно ниво, за основните трошоци (за дополнителни средства, може здруженијата да аплицираат за грант средства од светски фондации и здруженија);

5.   Мораме да напоменеме дека државата и дел од Јавните претпријатија претрпуваат големи финансиски загуби поради нерешавањето на овој проблем. Ќе наведеме само еден пример: ЈП „Македонијапат“ по завршните судски постапки во 2007 и 2008 год. по основ на штети кон граѓани, за сообраќајни незгоди со кучиња, мачки и сл. има исплатено 36.000.000,00 денари = 600.000,00 евра, а во тек се постапки за спорови во вредност од 52.000.000,00 денари = 850.000,00 евра. Тоа се огромни загуби на буџетот.                                                           Б

6.   Дополна на „Законот за благосостојба на животните“(донесен 2007 год., а стапен во сила 1.1.2008 год) и изработка на правилниците за спроведување на законот (во овој дел ја нудиме и нашата помош). Поради неприменување на Законот (или немање правилник за негово спроведување) многу сегменти од него не се применуваат, посебно делот за казнување на луѓе кои повредуваат, малтретираат животно или во најлош случај го отруле,односно убиле. Во многу земји тоа се смета за убиство е и строго казниво, а во Р.Македонија не е откриен ниту еден сторител, а да не говориме за негово санкционирање. За овој дел мора да нагласиме дека има премногу заинтересирани граѓани кои се обраќаат со поплаки. Ве молиме: Ова е од исклучителна важност, бидејќи во моментот ситуацијата е очајна;



Ви нагласуваме дека сме на располагање за контакт и соработка како здружение “Срце за животните“ во справувањето со овие и ред други проблеми, кои се однесуваат на заштитата на животните и заштитата на животната средина, преку кои заедно, со сите наши капацитети би придонеле секоја општина да ја направиме поубаво, побезбедно, похумано, организирано и чисто место за живеење!

Сите наши ресурси Ви ги ставаме на располагање: стручни соработници, контакти со видни и реномирани светски здруженија и организации од оваа област, за да придонесеме за решавање овие проблеми. Убедени сме за Вашата свесност дека ова се проблеми кои секојдневно и директно ги засегаат сите граѓани, а, со тоа, дека ќе Ви претставува приоритет решавањето на истите!

ВО ИМЕ НА СИТЕ ЉУБИТЕЛИ НА ЖИВОТНИТЕ И ЗАГРИЖЕНИ ГРАЃАНИ, се надеваме дека нашите предлози ќе бидат прифатени ЗА ПОДОБАР И ПОХУМАН ОДНОС КОН ЖИВОТНИТЕ.


Срце за животните
24.6.2009

Изменето од Majkl - 25.Јуни.2009 во 22:02

На 13.4.2009 год. „СРЦЕ ЗА ЖИВОТНИТЕ“ упати писмо до г.г. Стефан и МПЦ со апел јавно да ги повика верниците да го изостават месото на своите Велигденски трпези и да објасни дека не постои невина крвна жртва во името Божјо. Писмото беше објавено и во медиумите, во кое се вели:

До
Неговото Блаженство
архиепископот Охридски и Македонски г.г. Стефан

   Ваше Блажество г.г. Стефан,

Се наближува најголемиот Христијански празник Велигден, ден кога се слави Христовата милост и жртва за добробит и спас на човештвото. За нас верниците на овој свет ден му се дава уште поголемо значење на Животот во сите негови облици и форми. Но токму во деновите на духовниот и телесен пост, кога најмногу треба да стремиме кон телесно и душевно прочистување, покајание, смирение, молитва, љубов и милост кон сите Божји битија, се пристапува кон масовно колење на симболот на кроткоста Исусова – јагнињата.

Со желбите за мир, благосостојба и среќа се заборава секојдневното страдање, болка, страв и сетта таа неопислива агонија која ја “преживуваат“ животните, кои со своите животи ја плаќаат човечката алчност за јадење на нивното месо и месото нивните деца – водејќи се и повикувајќи се при тоа на Божјото име!

Зарем не е лицемерие да во деновите кога ја славиме добрината, правичноста и милоста на Исус Христос, заборавиме и бидеме соучесниси на неопислива физичка болка и агонија, страв и колење на животни? Зарем тој масовен геноцид на јагнињата не е симбол на нашата се поголема духовна пустелија? Ве молиме огласете се проговорете за спас и на тие Божји созданија и повикајте на нивно не убивање! Ако немаме милост кон оние кои токму од нашата милост зависат, како ќе стремиме кон патот на Божјата големина, непресушна добрина и мудрост? Како преку таква алчна бесчувствителност, апатичност и инертност кон послабите да му се доближиме на Оној кој заради нас го даде својот Живот? Зарем преку Исус Христос не се обновува и востановува чистата жртва, бескрвниот принос кој нему вистински му е мил, сакрамент на благодарност, принос од нафората што го претставува Неговото тело и виното што ја претставува крвта Неговата? А ние веднаш по светата Причест со телото и крвта на Господ Исус Христос прибегнуваме кон конзумирањето на невините, измачени и искасапени тела на тие кротки созданија Божји кои подеднакво како и ние луѓето чувствуваат љубов, радост и приврзаност но и страв, депресија и физичка болка!

Зарем секое беспотребно убиство нема огромно влијание врз човечката душа, правејќи ја истата отуѓена, затапена и индиферентна, чекор по чекор, се подалеку од Бога?

Ваше Блажество, со нашата молитва денес и Вам Ви се обраќаме, бидејќи Вие со Вашите зборови можете да влијаете и да ги повикате верниците да отстапат од месо на своите свечени Велигденски трпези, и на мирољубив начин со Живот да го прослават Вечниот Живот. Ве молиме да ги повикате верниците на прослава на Велигден во мир, сомилост и без насилство, со вегетаријанска храна и колачи, а животните да ги оставиме да живеат. Ширум светот луѓе умират од глад, но во празничниот дух скапува храна која секоја година се приготвува во прекумерни количини. Воедно месната индустрија е директно поврзана со гладта во светот и со искористувањето на природните ресурси, а наспроти тоа, со прифаќањето на безмесната исхрана директно се вклучуваме во борбата за човекови права и на сиромасите насекаде во светот!

Ве молиме огласете се и повикајте ги сите да ја имаат Христовата милост како критериум! Кажете ја Вистината дека не постои невина крвна жртва во името Божје!

Секој Ваш збор, мисла, обраќање на оваа тема би не исполнило со огромна радост и среќа.

За милостлив и среќен Велигден!

Срце за животните


Изменето од Majkl - 24.Април.2009 во 16:47